Frå Bratlund til Hagerup: Her kan du høyra den nye låten
I slutten av august slapp Jan Haaland, saman med Kristine Bjånes og resten av gjengen i bandet Steppin' Out, singelen «Av og til treng ein berre».
Teksten til låten var i utgangspunkt eit dikt som forfattar Bente Bratlund frå Os hadde skrive.
– Eg har lenge undra over kvifor musikarar ofte går over bekken for å henta vatn. Når vi har ein eigen poet i eiga bygd, så ville eg undersøka om vi kunne få synga nokre av hennar vers. Det var ekstra kjekt å setja tonar til dette flotte diktet, sa Haaland då om kvifor han valde å tonesetja Bratlund sine ord.
Sjå òg: SakkoSekkStudio med Jan Haaland og Olav Skorpen
– Eg har alltid vore begeistra for Hagerup
I går slapp Haaland og resten av bandet ein ny singel med namnet «Jeg gikk meg vill i skogene».
Låten er tilgjengeleg på dei fleste digitale plattformer som Spotify, YouTube, iTunes og Amazon Music.
Teksten kjem frå eit dikt frå 1939, skrive av Inger Hagerup.
Haaland fortel at han alltid har vore begeistra for Hagerup sine dikt, og det heile starta på ein hyttetur til skjergarden ved Kragerø.
– Der fann eg ei velbrukt diktsamling av Hagerup som eg byrja å lesa i. Spesielt diktet «Jeg gikk meg vill i skogene» har eg hatt med meg vidare.
– Mange år seinare var eg på ei vinreise i Piemonte der Claus Hagerup og Bibbi Børresen var guidar. Jeg nemnde for Claus at eit av moras dikt hadde sete seg i hovudet mitt, og at eg tenkte på å laga ein tone til det. Dette vart eg oppfordra av han til å gjera.
Gripande vakkert om livet
Haaland skildrar diktet til Hagerup som gripande, vakkert og vemodig.
– I diktet fortel Inger Hagerup i metaforiske vendingar om kjærleiken, samlivsutfordringar og jakta etter lykke. Trass i at diktet er frå 1939 vil det nok aldri bli forelda.
– No er tonen til diktet laga, men dessverre rakk ikkje Claus å få høyra sangen før han gjekk bort legg Haaland til.
Medverkande – «Jeg gikk meg vill i skogen»:
Steppin’ OUT:
Jan Haaland - vokal
Kristine Bjånes - vokal, arrangør
Knut Vidar Garlid - tangenter, vokal, arrangør og musikalsk leder
Nils Midtseter - trommer
Gjestemusikarar:
Steinar Lyssand - gitarer
Tormod Bjånes - bassgitar
Studio:
TomTom Studio, Tomas Haugland.
Plateselskap/utgiver:
Løft, Myrna Braza.
Video og foto:
Oddmund Lunde og Liv Randi Lind