To frå Os på banen mot Lørenskog

To unge ishockeyspelarar frå Os fekk i går bryna seg mot Lørenskog. Etter ti år i GET-ligaen mista Lørenskog lisensen sin i fjor, og rykte ned til 2. divisjon.

– Dei har nokre spelarar som er heilt utruleg gode. Det var éin gong eg trudde eg skulle klara å koma meg forbi backen, men han huka tak i meg, fortel Stian Klakegg.

Bergen tapte 0-7.

– I skot var det noko jamnare, 27-32, men vi klarte ikkje å skåra. Eg hadde sjølv eit forsøk, men skotet var for dårleg, fortel Klakegg.

God debut

Stian debuterte på A-laget til Bergen Ishockeyklubb som 15-åring, frå i haust har han spelt 7-8 seniorkampar ved sidan av U18-serien.

Kameraten Kai Daniel Øye fekk debuten sin i går.

• Les òg: Kai Daniel og Stian på kretslaget (februar 2017)

– Kai Daniel klarte seg veldig bra, og var ikkje skuld i nokre minusmål, skryter Stian.

Laget speler med formasjonen 2-2-1, der dei unge osingane vekslar om å ligga på topp.

– Jobben vår er å jaga backane deira, få dei til å mista pucken så vår center-spelar kan plukka den opp og skåra. Det blei tøft i går, men det var òg kjekt å møta eit sterkt lag som Lørenskog.

Tett program med trening og kamp

Dei to kameratane frå Søfteland fyller 17 år i år, og har eit tett kamp-program.

– Vi har to kampar til med A-laget denne helga, og to med U18. Også dei neste helgene blir travle.

Innimellom kjem trening med laget og individuell styrketrening. Klakegg fortel at han totalt er oppe i 29 treningstimar i veka.

– Det er fem rundar igjen i 2. divisjonsserien, men litt fleire i U18. Der er målet å ta 3. plassen i 1. divisjon.