Frå Vesterålen til Os for å opna fiskebutikk

Bildeserie:

1 av 3

– Eg har nett køyrd frå Myre i Vesterålen, men måte stoppa for å fylla litt luft i bakdekkene, seier Hlynur Freyr og ler.

Han har lasta kjølebilen sin med 1200-1300 kilo med fersk fisk, fiska med eigen båt i går. Planlagt opning av fiskebutikken i Elvebakken er torsdag klokka 10.

– Det har vore ei travel tid med klargjering av butikken, og det var ikkje meininga at eg skulle henta fisken sjølv. Men dei heime står på i lokalet mens eg får ein spennande tur sørover.

Ifølgje Google Maps vil turen ta 25 timar. Butikken opnar om 44 timar. Freyr har med seg ein kamerat og dei to skal køyra på skift til dei er i Os.

– Fersk kvalitet

Interessa og pågangen har vore stor etter at Freyr i juni fortalde at han ville opna fiskebutikk i Os.

Med den 36 fot store sjarken «Isbjørn» fiskar Freyr med mannskap 500-600 tonn fisk i året.Butikken får namnet Isfisk.

– Fisken blir bløgga med det same den kjem om bord, så går den rett i isvatn. Fisk frå linefiske har ein heilt annan kvalitet enn fisk tatt med snurrevad og annan not, forklarte Freyr i juni.

Fisken han no har i bilen blei fiska i går og er tatt rett frå sløyelinja og inn i kjølebilen.

– Skal du har betre kvalitet enn dette må du nesten fiska fisken sjølv.

Stort utval og ferdig lunsj

Freyr er frå Island og bur i Strøno. Mens han og familien har jobba med å innreia butikklokalet i Byvegen har han fått rikeleg med spørsmål frå utolmodige komande kundar.

– Interessa har vore stor, eg reknar med å få ein travel opningsdag.

Bilen hans er no lasta med ei rekkje artar, blant anna torsk, sei, hyse, brosme, lange, uer og kveite.

– Eg skal levera til nokre kundar i Bergen på veg heim, men mesteparten skal i butikken på Os.

– Vi får også røykt fisk, krabbe og hummar i utvalet - og vil også by på varme ferdigrettar av fisk, og på suppe som er lett å ta med seg og eta med det same.