Framtida for Os Taekwon-do Klubb ser veldig bra ut

Bildeserie:

1 av 5

Lagleiar, og leiar av Os Taekwon-do Klubb, Jan Rune Sund, fortel at klubben stilte med 8 deltakarar og 2 coacher under meisterskapen. Pernille Fonn Fjæreide, Ikram Ouhadou, Ask Sandven Kaarbø og Monir Ouhadou deltok i sitt første NM. Bjørnar Aarøe og Kaisa Torgilstveit deltok for andre gang, mens Frank Sebastian Sperrevik og Joakim Bertelsen deltok for tredje gang.

Roger Slettstrand og Jan Rune Sund var coacher. Pernille, Ikram, Ask, Kaisa og Bjørnar deltok i både mønster og sparring, mens Monir, Joakim og Frank Sebastian deltok i sparring. Frank deltok også på regionslaget i lagsparringskonkurransen.

– Resultatmessig må vi seia oss godt nøgd, seier Sund. Vi hadde ein del stong-ut i mønsterkonkurransen, men alle hadde gode prestasjonar, og eg tykkjer vi har mykje positivt å jobba vidare med.

Solid vinnar og små marginar

Sund fortel at det var i sparringøvingane Os-klubben gjorde det best.

– Frank Sebastian Sperrevik gjekk solide kampar, og vann alle kampane som klar vinnar. Dette gjorde at Sperrevik gjekk heilt til topps i klassen junior -68 kg.

– Ask og Monir gjekk begge gode kampar, fortel Sund, men begge måtte gje tapt i finalane. Uansett var det ikkje mykje det var snakk om på marginane for at dei begge kunne ha teke sigeren, legg Sunde til.

Begge enda opp med sølv i klassane +75 kg og eldre junior 75 kg raudt belte.

Sund meiner dette er ekstra imponerande for to NM-debutantar.

– I tillegg gjorde Bjørnar Aarøe ein veldig figur, og kjempa seg til ei bronse i klassen senior +85 kg.

Meisterskapen vart halde i Ekeberghallen i Oslo. Totalt deltok 475 deltakarar fordelt på 960 startar på 8 ringar.