Fredag blir årets travlaste dag på Halhjemsvegen

Bildeserie:

1 av 1

Fredag før pinse i fjor var det kø frå Halhjem og gjennom Liafjellstunnelen, 4,7 kilometer frå ferjekaien!

Dette var i 18-tida. Køen skal ha flytta seg oppover frå ferjekaien i 14.30-tida. Året før var den på topp i 21-tida.

– Det er den travlaste dagen i året på dette ferjesambandet og det er retning sør som er verst. Måndag 2. pinsedag er det motsett veg, seier Jonny Slettevold, kaptein på Fjord1-ferja MF «Raunefjord», som går mellom Halhjem og Sandvikvåg.

I tillegg til reise i samband med pinsen er det handballfestival på Stord med innleiande rundar fredag frå klokka 19 og premieutdeling måndag. Rundt 350 lag deltar, mange av dei er frå Os og bergensområdet.

Fleire tiltak

Politiet i Os har vore i dialog med drivarane av begge sambanda frå Halhjem, Fjord1 til Sandvikvåg og FosenNamsos til Våge på Tysnes.

– For å ta unna mest mogleg av køen er det viktig å fylla ferjekaien best mogleg.

– Det blir det redusert frå 4 til 2 køar mot Våge, så Sandvikvåg får mest mogleg av kaiplassen. Det er dei som har størst pågang. Det blir òg billettering oppover forbi rundkøyringa mot Halhjem Kjøkken, fortel politiførstebetjent Rune Fimreite.

Ber reisande til Tysnes køyra om Fusa

Kor tid køen startar og kor lenge den blir verande lang er vanskeleg å seia.

I 2014 var den på topp i 21-tida. Køen i fjor skal ha byrja å bygga seg opp i 14-tida i fjor og var nesten 5 kilometer lang i 18-tida. Vi kjenner ikkje til om dette var toppen.

– Vi var på staden i rundt 5 timar i fjor. Vi må be alle om å visa tolmod. Dei som skal til Tysnes, og har høve til det, bør vurdera å køyra om Mundheim og over brua.

– Eg forstår òg at det kan vera frustrerande for dei som bur på Søre Neset, som berre skal heim til middag. Men køen kjem og det beste er gjerne å førebu seg godt og legga opp til minst mulig køyring i den travlaste tida.

Skal du til Nore Neset, Øyane eller Strøno vil det nok vera best å køyra over Ulvensletta.