Fridagar og jubileum: Godt nytt år!

Vi ønskjer alle våre lesarar, abonnentar, annonsekundar og samarbeidspartnarar eit godt nytt år!

2021 starta med ei problemfri natt med feiring og fyrverkeri og heldt fram med ein nydeleg soloppgang til blå himmel over ein blikkstille fjord.

Det kalde, lette vintervêret skal halda seg gjennom helga og gjennom heile neste veke - einaste nedbør er venta å koma som snø laurdag - mens søndag er venta å bli skyfri. Sjå vêrvarsel for Osøyro på VG Pent.

Også skuleåret får ein mjuk start, måndag er det utviklingsdag og elevane har fri.

Korleis er det med dei andre fridagane og feriane i år?

• Vinterferien er første veka i mars (veke 9), siste skuledag før ferien er fredag 26. februar.
• Påskeferien er den første veka i april (veke 13), siste skuledag før påskeferie er fredag 26. mars.

1. mai landar på ein laurdag, men seinare i mai kjem to langhelger på rad.

Med Kristi himmelfartsdag torsdag 13. mai, skulefri fredag 14. mai og grunnlovsdag måndag 17. mai blir det fem samanhengande fridagar for elevane - og mange vaksne.

Pinsehelga er i år i slutten av mai, med skulefri 2. pinsedag, måndag 24. mai.

Siste dag før sommarferien er fredag 18. juni. Første skuledag etter ferien er tysdag 17. august.

• Sjå skuleruta for Bjørnafjorden kommune, 2020-2021

Haustferien er i veke 41, siste skuledag før ferien er fredag 8. oktober.

Fredag 5. november er fridag.

Siste skuledag før juleferien er måndag 20. desember. Neste julaftan er på ein fredag.

• Sjå skuleruta for 2021-2022

Jubilantar og andre tilbakeblikk

I juni i år kan Oseana markera 10 år sidan opning.

Blant firma i Bjørnafjorden kommune som har 25-årsjubileum er Oleanna, Hodneland Bygginnredning og Normo Automasjon.

Det er òg 25 år sidan Karsten Warholm blei fødd, Tupac Shakur blei drepen, Eminem ga ut sitt første album Infinite, Max Manus døydde, Diana fekk innvilgd skilsmisse frå prins Charles og NRK2 starta sine ordinære sendingar.

Desse norske og utanlandske kjendisane fyller 50 år i år: Lasse Kjus, Kjetil André Aamodt, Ådne Søndrål, Mark Wahlberg, Thomas Giertsen, prinsesse Märtha Louise (22/9), Erik Mykland, Ole Klemetsen og Snoop Dogg.

Det er òg 50 år sidan ulv blei totalfredag i Noreg, Ekofiskfeltet blei offisielt opna av statsminister Trygve Bratteli, verdas befolking passerte 4 milliardar og Leger Uten Grenser blei grunnlagt i Paris.

Det er 75 år sidan ...

• FN heldt si første hovudforsamling (London)
• Hồ Chí Minh utropte seg til president i Vietnam
• Winston Churchill brukte omgrepet «jernteppe» om skillet mellom Øst- og Vest-Europa for første gong
• Universitetet i Bergen blei vedtatt oppretta
• Svinesundbrua blei opna
• SAS blei starta
• Den franske moteskaperen Louis Reard lanserte bikinien
• Lyn blei noregsmeister (cupmester) i fotball etter å ha slått Fredrikstad 3-2 i finalen

Blant kjente folk som fyller 75 år i år finn vi John Paul Jones (Led Zeppelin), Dolly Parton, Donald Trump, Trond Kirkvaag, Sylvester Stallone, Victor Norman, Bjørn Kjos, Bill Clinton, Steven Spielberg og Oliver Stone.

Det er 100 år sidan ...

• Kvinner fekk stemmerett i Sverige (7 år etter Noreg)
• Norges vassdrag- og elektrisitetsvesen blei oppretta
• Dovrebanen opna for trafikk
• Norsk Speiderpikeforbund blei stifta
• Fridtjof Nansen blei engasjert av Folkeforbundet og Røde Kors for å hjelpa hungersramma i Russland.
• Sugar Ray Robinson (amerikansk boksar) blei fødd 3. mai (d. 1989)
• Colin Archer, norsk båtkonstruktør (f. 1832) døde 8. februar

Albert Einstein fekk Nobelprisen i fysikk i 1921, Tottenham vann FA-cupen, Burnley blei engelsk ligameister og Frigg blei noregsmeister (cupmester) i fotball etter å ha slått Odd 2–0 i finalen.

(Kjelder: Bjørnafjorden kommune, Purehelp og Wikipedia, år for år)