Fugleinfluensa påvist i Os. I går kom nok ei melding.
Kommunen ber folk halda seg sjølv og husdyr vekke frå døde fuglar, og ber samtidig om tips.
Bjørnafjorden kommune opplyser i dag om påvist fugleinfluensa i ei svane som blei funne død på Røykenes i førre veke.
– Dersom du oppdagar døde villfuglar og mistenker fugleinfluensa, er det viktig at du varslar kommunen, seier kommuneoverlege Klaus Melf i ei pressemelding.
Ved funn av død fugl ber kommunen deg om å ringa Bjørnafjorden brann og redning, som har utstyr til å handtera den.
– Vi har fått éi melding sidan i går. Det var ein som hadde observert ein død skarv ved Langøya utanfor Sørstrøno, fortel Arne Rødberg frå Bjørnafjorden brann og redning.
– Observasjonen blei gjort dagen før. Vi reknar med at fuglen kan ha drive langt på dette døgnet, så vi brukte ikkje tid på å leita etter den.
Det er dermed uvisst om også denne var smitta.
Melf oppmodar folk om ikkje å ta på fuglar som er død eller ser sjuke ut, og å prøva å halda hundar og andre husdyr unna døde fuglar.
– Om du ser fuglar som ser sjuke ut, bør du òg halda deg vekke, men du treng ikkje kontakta kommunen eller brannvesenet. Dei kan bli friske igjen.
