Full drift i nytt studio

Vil du spela inn CD? Allakten og Os Rockeklubb har fått ORBO-bassist Paul Inge Vikingstad bak spakane i det nye studioet.

Paul Inge Vikingstad er no på frivillig engasjement i studioet i Allakten. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøytorsdag 02. feb. 2012 22:30

-Endeleg! Eg har rett og slett ikkje tid til å setja meg inn i dette, og rockeklubb-kollega Espen Hjertaas, som kan faget, er også ein mann med for få dagar i veka, seier Kjetil Osablod Grønvigh.

Grønvigh jobbar for Allakten og er i tillegg leiar for Os Rockeklubb, som har ansvaret med drifta av det nye studioet i Allaktivitetshuset, til liks med drifta av musikkbingane på Kuventræ og Søfteland.

– Studioet har blitt veldig bra, men utfordringa har lagt i å finna nokon som kan drifta det. I fjor blei det halde to kurs i regi av BRAK, så vi har folk på veg til å bli flinke nok, men med mister Vikingstad fekk vi oss ein som både kan faget og kan stilla opp for dei som vil bruka studioet.

Ny ORBO-osing: Paul Inge

Ole Reinert Berg-Olsen flytta frå Bergen til Os i 2002, då han var i ferd med å bli fulltidsartist. Også bandmedlem Ine Tumyr har lenge budd i Os og no følgjer bassist Paul Inge Vikingstad etter.

– Eg kjøpte einebustad på Lekven i haust og hadde innviingsfest på nyttårsaftan. No har eg og sambuaren min utsikt mot Folgefonna og gåavstand til Ole, seier Paul Inge om naboskapen med ORBO-vokalisten.

Sjef i Studio Allakten

Paul Inge er opprinneleg frå Karmøy, men har budd i Bergen dei siste seks åra. Jobben i ORBO & The Longshots er meir eller mindre på fulltid, men litt innsats for Oseana blir det, i tillegg til at han no engasjerer seg på frivillig basis som sjef i studioet i Allakten.

– Eg har jobba litt i studio frå før, blant anna som assistent i Erik Grønner sitt studio på Sotra, seier Vikingstad om si studioerfaring.

Fekk "Lakeview Men" i studio

Studioet sto klar i fjor vår og har blitt brukt av nokre lokale band, blant anna Abstractium og Heed The Heretic. Ondt i Hode skal bruka det frå neste veke av.

I førre veke var bandet "Lakeview Men", som består av Jo Inge Hjerkinn (gitar og vokal) og Rune Letrud (bass) frå Gudbrandsdalen og Bernt Ola Bjørkedal frå Ålesund, i studio for å spela inn to eigne låtar og éi coverlåt til deira første EP.

Dei tre bur no i Bergen og blei kjent med Paul Inge via ORBO og De Musikalske Dvergene.

– Vi var opprinneleg eit Rainmakers-tributeband, eit band vi etter kvart fekk god kontakt med og var med på turné. Vi skal med dei på ny turné i Noreg no, sa Jo Inge til Midtsiden i førre veke.

Bandmedlemmane har også vore stor fan av De Musikalske Dvergene, som ORBO produserer plate for.

I bruk - men med plass til fleire

Det DNB-, Frifond- og BRAK-sponsa studioet i Allakten er ope for alle og gratis for ungdom.

– Men vi har hatt fleire andre som har vist interesse, og nokre vaksne utanom Lakeview Men som har vore innom i studioet.

– No håper vi flest mogleg kan ha glede og nytte av dette, så Paul Inge får litt å henga fingrane i, seier Kjetil Osablod Grønvigh.

Spennande? Vil du ha ukas høgdepunkt i innboksen?

Les meir om

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.