Full fart etter ferien
Ingenting blei gjeve ved døra då A-lagsspelarane var tilbake på banen etter ferien. I neste veke speler dei to kampar på fire dagar.
Os avslutta vårsesongen med 8-0 heime over Kopervik, 3-3 borte mot Sandnes Ulf 2, 2-0 heime over Tertnes og 2-2 borte mot Austevoll.
8-4-1 og 45-16 i målforskjell heldt til at Os kunne ta ferien på topp av tabellen, med 7 fleire plussmål enn Arna-Bjørnar, som også har 28 poeng etter dei 13 første rundane.
– Det er tett bak oss på tabellen, mykje kan snu på éin runde.
– Men det går nok 4-5 rundar før det blir ei skikkeleg luke frå dei beste til resten, trur Os-trenar Tim Henrik Sperrevik.
I bra form etter ferien
Etter Austevoll-kampen og fram til førre fredag, altså cirka tre veker, har spelarane hatt ferie.
– Eg lagde ikkje noko opplegg for ferien deira, dei veit kva som skal til for å halda seg i form. Og fleire ser ut til å ha trent godt også i friperioden, for vi har hatt bra driv både fredag, laurdag og no måndag kveld.
– Alle er tilbake og dei som sleit med småskadar i vekene før ferien er friske igjen.
Startar med Bjarg og Åkra
Os trener også onsdag til laurdag og måndag og tysdag neste veke før haustsesongen startar med bortekamp mot Bjarg onsdag 1. august (kl 19).
Os slo Bjarg 2-1 heime i serieopninga i vår. Bjarg ligg no på 5. plass berre 4 poeng bak Os.
– Bjarg er godt organisert og i bra form. Dei liknar litt på oss, ein liten gjeng rutinerte spelarar saman med nokre spennande, yngre talent.
– Vi har nok samla sett meir å by på, når det kjem til å stå serien ut og kjempa i dei tøffe, seige haustkampane. Men kampen på onsdag blir spennande og viktig.
Etter onsdagens kamp er det berre tre dagar til neste kamp. Haustens første heimekamp går mot Åkra laurdag klokka 15. Os spelte 0-0 borte mot Åkra i vår.