Full fyr i bakgården
Brann i Os sentrum: Vegard Strønen frå Varde Film og Media fekk ikkje tatt bilde av denne brannen - for denne gong måtte han stå for sløkkearbeidet.
Vegard Strønen frå Varde Film og Media rykker ut med fotoapparat på dei fleste brannane og ulykkene i Os. Denne gong måtte ørna jakta nærmast reiret, og kameraet fekk han ikkje tid til å bruka.
– Det var tilfeldig at eg såg ut vindauget og oppdaga brannen, seier Vegard, som bur i etasjen over delar av Rosvold Sport.
– Eit stort bål
I bakgården mellom Fisketorget, Apotek1 og Rosvold sto ei grind med papp i full fyr.
– Det var eit skikkeleg bål!
– Eg tok med meg pulverapparatet og ringte brannvesenet medan eg sprang ned trappa, fortel Strønen.
Pulver var ikkje nok
Vegard fekk tømt pulverapparatet på flammane, men brannen blei ikkje sløkt.
– Heldigvis sto det nokre kanner med vatn i bakgården, så då brannvesenet kom fram var det berre litt glør igjen.
Sagde hol i veggen
Brannvesenet var raskt på staden og dynka grinda med vatn.
– For å vera sikre på at ikkje brannen hadde spreidd seg til husveggen skar vi hol i veggen med motorsag, fortel Terje Håvardstun frå Os brannvesen.
– Det var fare for spreiing, men Vegard gjorde alt rett, ringte oss og starta sløkkinga. Han er tydelegvis like flink med pulverapparatet som med fotoapparatet.