Full klaff for Jørgen

Jørgen, som byrjar i 7. klasse til hausten, har ifølgje pappa alltid likt å fiska. Men det var etter ein dag med fiskeaktivitet for ungdom med Os Jakt og Fiskelag at han i fjor bestemte seg for å prøva seg i Oselvo.

– Eg og han hadde oss ei lita, resultatlaus økt i sone 1 i fjor, så i dag var hans første skikkelege fiskedag i Oselvo. Min første tur også, faktisk, seier pappa Jonn Norvald Kuven.

Var skeptisk

Om ikkje han har fiska i elva før har Jørgen lest seg opp litt på prohd.no, som dei siste åra har følgt fisket tett.

– Han var skeptisk til fiskekortet eg hadde skaffa, for han har følgt med og fått inntrykk av at sone 3 ikkje er der det er lettast å få fisk , seier Jonn Norvald.

Han fekk nok god hjelp av at Oselvo er ekstra stor etter all nedbøren i helga.

– Dette blei jo full klaff, fisk etter 45 minutt og ein fin fangst blei det òg.

To laks på to timar

Etter 45 minutt beit laksen på spinneren til Jørgen.

– Eg visste at eg skulle lata fisken ta med seg snøre og gå, men eg ropte på pappa med ein gong fisken var på, fortel Jørgen.

Jørgen tok ein laks på 5,0 kilo. Ei lita stund etterpå fekk pappa ein laks på 3,2 kilo.

– Vi hadde kort håv så eg blei våt då eg skulle hjelpa til med å få Jørgen sin laks på land. No skal vi heim og få på oss tørre klede, så blir det ned i elva igjen for å sjå om vi får oss ein til.

Midtsiden samlesiden: Jakt og fiske