Søre Neset ny 11 bane 2018

Full klaff på Søre Neset sin opningsfest

Video og bildeserie: Korpsmusikk, fyrverkeri og braksiger då nytt gras blei opna og innvia med seriestart for nytt A-lag.

image
image
image
image
image
image
image
image
image
image
image
image
image
image
Av: Kjetil Vasby Bruarøy

Onsdag 19. april i fjor opna Søre Neset il ein heilt ny 7-arbane saman med sandvolleyballbane og ny tribune.

I går, søndag 15. april, sto 11-arbanen frå tidleg 90-talet, som fekk kunstgras i 2003, klar med nytt dekke.

– Vi var rundt 15 personar på dugnad då kunstgraset kom tysdag. Vinteren var endeleg vekke og vi såg at vi kunne rekka å få banen klar til seriestart, seier leiar i Søre Neset il, Bjarte Aarvik.

I løpet av det siste året har idrettslaget både fått ny bordtennisklubb, ny handballgruppe og nytt A-lag i fotball. Frå før er dei gode i volleyball, og i løpet av 2017 vaks dei mest i Os kommune når det kjem til støtte frå Grasrotandelen.

– Idrettslaget er no oppe i cirka 280 medlemmar, fortel Aarvik.

Opna med eit brak

Ein time før kampstart for Søre Neset sitt A-lag mot Smørås 3 var det opningsseremoni med talar, korpsmusikk, snorklipping og fyrverkeri.

Ole-Vidar Moberg styrte showet, Tom Leonsen frå Os kommune heldt tale, Kristine Nygård frå NFF Hordaland klipte snora, Søre Neset Musikklag spelte og Pro Pyro fyrte av krutt.

Trond Mohn blei takka for raus gåve til nok eit anlegg og både Nygård og Leonsen var imponert over kva Søre Neset il har fått til.

Det nye anlegget er ikkje berre større og betre, det er ferdigstilt med prydbark og pyntestein.

Unge spelarar danna tunell og gav det nye A-laget ein fantastisk entré til kamp.

Herrelaget skuffa ikkje den fullsette tribunen - sjansane og dei første skåringane kom kjapt og Søre Neset vann til slutt med god margin.

Søre Neset - Smørås 2 5-1 (2-0)
Målskårarar, Søre Neset: Jan Even Frøyset (1-0), Tommy Ludvigsen Matre (2-0), Emilis Zilinskas (3-1 og 4-1) og Vegar Solstrand Ludvigsen (5-1).
Søre Neset: Kristian Elholm - Audun Røren, Erik Askvik, Jan Even Frøyset, Børge Solberg, Lars Rune Moberg, Fredrik Holmefjord Solbakken, Tommy Ludvignsen Matre, Martin Snilstveit, Frode Rangset, Frode Buvik, Adrian Frotveit Arnesen, Mounir Aouachria, Vegar Solstrand Ludvigsen, Emilis Zilinskas og Frank Haugland.
Sjå kampfakta på fotball.no

Fleire saker