Full pott i spennande heimekamp
Os slo Brann 2 i det som var årets første siger på Kuventræ.
Os tok i kveld imot Brann2 til 17. serierunde.
Éi skåring var nok, men kampen såg lenge ut til å bli målrik.
– Det kjennest fantastisk å vinna i dag. Vi møter god motstand, og gjestane har ballen mest, men vi knuser dei på sjansestatistikken framfor eit stort og fint publikum, seier trenar Endre Brenne nøgd.
Målet kom i 15. minutt. Moldskred finta vekk midtstoppar og avslutta med venstre. Keeper var på ballen, men skotet var for hardt og den trilla i mål.
Os har spelt uavgjort mot både Fyllingsdalen og Djerv 1919 p Kuventræ i år, men dette var sesongens første heimesiger i serien.
Os - Brann 2 1-0 (1-0)
Målskårar: Mats Cato Moldskred (15.)
Dagens Os-spelar: Mats Cato Moldskred
Os: Chris Sunde Midtun - Anders Havsgård, Torgeir Lunde, Vegard Strønen Skeie, Andreas Støle-Hansen - Rune Mo, Steffen Kvamsdal (Jonas Hovland (79.), Rafael Villén - Espen Haraldseid (Stian Dyngeland 60.), Roger Ekeland (Sander Kvittingen 87.) og Mats Cato Moldskred.
Gule kort, Os: Espen Haraldseid og Rune Mo
Brann 2 opna best og pressa Os dei første ti minutta. Etter to cornerar mot Os var det Kvamsdal sin tur, men det blei berre nesten.
Så sendte han Moldskred inn til skåring, og så byrja heimelaget å ta meir over, med eit godt angrep i 18. minutt og corner både i 21. og 23. minutt. I 26. minutt slo Villén tunell på Brann 2forsvaret og sendte høgreving Espen Haraldseid gjennom. Han avslutta hardt, men rett utanfor.
I 28. minutt trefte Moldskred tverrligger på frispark nesten frå sidelinja. I returrommet sto Havsgård og knuste til på halv volley, men ballen gjekk utanfor.
Andre omgang starta med endå høgare tempo. Ekeland og Moldskred har skifta plass, og Ekeland pressa seg forbi på venstreving fleire gongar, som i opningsminuttet av andre omgang, då han avslutta utanfor lengste stolpe etter sjølv å ha gått nesten til dødlinja.
I 46. minutt skaut Moldskred igjen, men denne gong rett utanfor.
Fleire målsjansar i debuten
I 60. minutt kom nysignerte Stian Dyngeland inn på høgre kant.
– I Fram har eg spelt både back, ving, spiss og til og med vore reservekeeper. Eg bryr meg ikkje kvar eg speler, berre eg kjem innpå, sa han i oppvarming i pausen.
Han fekk vist at han spelte 2. divisjon i vår, og kom òg til nokre sjansar. Den eine avsluttinga var både hard og godt plassert, men Brann 2 sin keeper i 2. omgang, Hermann Ræstad, har god rekkevidde.
Rune Mo fekk avslutta i 5-meteren etter innkast av Torgeir Lunde, men også denne blei blokkert av Ræstad.
Så tok gjestane meir over. Mikail Maden på Brann 2 var playmaker, og tolmodig heldt dei i ballen, snudde spelet, kom til innlegg og fekk seg nokre frikast.
Men Os var skumle på nokre overgangar, og Rafael fekk eit skot rett over mål i 81. minutt. På overtid fekk Os to cornerar som Moldskred og Dyngeland både skjerma og nesten fekk noko ut av, men kampen levde til vi høyrde fløyta.
Dommar Michael Szajnfeld gjorde ein stødig jobb frå start til slutt.
Neste motstandar tapte 9-0 i dag
Os klatra med dagens siger frå 10. til 8. plass på tabellen, forbi Brann 2 og Sogndal 2.
Os speler neste kamp måndag om ei veke, borte mot nettopp Sogndal 2, som i dag tapte heile 9-0 for Strømsgodset 2.