Fulle fem til Tomme Flasker

«Farlig følsomt» skriv Alisa Larsen i BT om «The Other Side of Love», countrybandet Empty Bottles, Broken Hearts sitt andre album.

Albumet kom ut tidlegare denne månaden med sleppefest i Bergen siste helga i vinterferien.

«Empty Bottles Broken Heart har en helt spesiell plass på Bergens musikkscene. Med sin sjangertro honkytonk (…) har de bygget ned grensene mellom subkulturer ved å lage noe av den mest nytelsesverdige, upretensiøse musikken jeg vet om» skriv Larsen i Bergens Tidende.

– Det er veldig kjekt med ei slik mottaking. Releasekonserten på Garage gjekk òg veldig fint, fortel gitarist Vegard Skorpen.

Han er saman med Helge Tveit og Yngve Oma osingane i bergensbandet. Dei har spelt på alle dei tre store countryfestivalane, i Breim, Vinstra og Seljord, men aldri i Os.

– Sleppefesten var 9. april, helga etter var vi på Sementen i Stavanger. Fredag speler vi på utestaden Internasjonalen i Oslo.

Starta i 2005

Empty Bottles, Broken Hearts består av:
Helge Tveit - Vokal, gitar, trommer og mandolin
Agnes Maria Rokkan - Vokal
Vegard Urne - Vokal, gitar, lap steel og trommer
Helene Lund Johansen - Fele
Lars Arne Lindland - Gitar, mandolin og lap steel
Vegard Skorpen - Vokal og gitar
Yngve Oma - Bass

Vegard fortel at bandet eigentleg berre var ein gjeng av studiekameratar og andre venar som øvde saman.

– Vi samlast om fredagane og øvde og tok oss nokre øl. Vi hadde ingen plan, men så blei det laga nokre låtar. Første spelejobben vår var på plate- og merchbutikken Robot i Bergen.

Skorpen, som har skrive musikk for fleire andre, fortel at det er Helge og Agnes som skriv dei fleste låtane, men at han hadde laga den eine låten på førre album, «Here's Empty Bottles Broken Hearts» (2011).

Her kan du sjå musikkvideo til ein av dei andre låtane frå førstealbumet, «Big Girl».

Sidan har dei gjeve ut fleire singlar før oppfølgjaren nyleg kom i hyllene.

På Køntri i Gulen

Empty Bottles, Broken Hearts har spelt i Gulen før og siste helga i juni skal dei opp igjen over fylkesgrensa, då til den nye festivalen Køntri.

– Elles er det førebels ikkje booka inn noko særleg.

– Er det dette bandet som tar mesteparten av tida di om dagen, eller har du fleire parallele prosjekt?

– Nei, det er mest travelt med Ada Keita Band. Vi er mykje i studio om dagen, fortel Vegard, som med Ada Keita la sin første singel på Spotify og iTunes i februar.

Ada Keita Band består av Håvard Moberg, Vegard Skorpen, Marian Captain, Åse Urdahl og Ada Keita.

Bandet held på å spela inn debutalbumet. Her kan du sjå video til låta «Not Even Close».

Les òg: Fullt hus og funky stemning (med video frå påskeblues på Peppes 2015, der også Ada Keita Band spelte)