Romjulsblues på Peppes 2018

Fullt hus for sjette gong

Mens Howlin' Jukes fekk det til å svinga på Os, sto arrangør Steinar Lyssand på scenen på Voss.

image
image
image
image
image
Av: Kjetil Vasby Bruarøy

Romjulsblues på Peppes og Bar(t) blei i går arrangert for sjette år på rad. Som vanleg var det fullt hus.

– Dei siste billettane blei selt på dagen før konserten starta. Eg trur ikkje vi har hatt ledige billettar til å selja i døra eit einaste år, seier arrangør og gitarist Steinar Lyssand.

Han har laga romjulsblues og påskeblues på Peppes og Bart i ei årrekkje. Første romjulsblues var i 2013, seinare har han fått konkurranse av både Osfest si storsatsing på Nore Neset vesle nyttårsaftan og Hannes Musikkbar sitt tette program, men likevel har han selt alle billettane kvart år.

Gyldig fråvær

Nokre år har bergensmusikaren Dag Bergesen vore medarrangør. I år hadde han ikkje tid å vera med.

– Eg fekk ikkje tid eg heller. Rett før jul blei eg invitert til å spela med Shades of Blues, eit legendarisk band frå Voss, etablert i 1966.

Spelejobben var i går, under Jolajazz i Vossasalen på Park Hotel.

– Dei ville ha med seg ein ekstra gitarist. Eg kjenner Lars Hammersland i bandet frå før. Utanom meg og han består bandet av pensjonistar, gamle ringrevar frå musikarmiljøet på Voss. Gjengen på Peppes gav grønt lys, dei sa dei takla konserten heime i Os sjølv, så då takka eg ja.

Geir Mæhle i storslag

Howlin' Jukes består òg av erfarne musikarar. Bandet er berre 4-5 år gamalt, men dei som var publikum under Osøren Blues & Jazzfestival har nok sett vokalist Geir Mæhle før.

– Då spelte han i bandet The Ladyshave Experience. Han er flink å synga og veldig energisk på scenen. Osingane får nok ein kjekk kveld, sa Steinar laurdag kveld.

Arrangøren fekk rett, og det var ikkje berre Mæhle som skapte energi på Bar(t). Gitarist Paul Blom var ut blant publikum og spelte solo allereie på første låt, og på neste låt, «Route 66», var det sving på dansegolvet.

Howlin' Jukes består av:
Vokal: Geir Mæhle
Gitar: Paul Blom
Bass: Geir Blom
Trommer: Jan Petter Ågotnes

I videoen over ser du ein kort stemningsrapport frå første del av kvelden.

Fleire saker