Fusa vidaregåande skule einaste i landet med nytt tilbod

Bildeserie:

1 av 2

I vinter vart det vedteke i Fylkestinget at Fusa vgs. får lov å starta opp med eit nytt utdanningstilbod; TAF (tekniske og almenne fag) -Restaurant og matfag.

Rådgjevar og spes.ped.koordinator ved skulen, Camilla R. Nesheim fortel at skulen lenge har hatt eit ønskje om å få dette til, og no er dei svært glade for endeleg å ha lukkast;

– Både skulen og bedrifter er meir enn klar til å starte opp allereie neste skuleår, fortel ho.

– Det er eit stort behov for fagfolk i bransjen, og det er også eit politisk satsingsområde innan utdanning.

Næringa bidreg

– Vi hadde ikkje klart å få dette til utan å ha næringa med på laget, fortel Nesheim.

– Solstrand Hotel & Bad, Scandic Flesland og Helse Bergen har vore bidragsytarar for å få dette til.

– Sjølv om me allereie har ordinært tilbod på Restaurant og matfag på Fusa vgs., måtte det behandlast politisk som eit nytt utdanningstilbod.

Einaste i Noreg med TAF-Restaurant og matfag

I Hordaland er det berre to skular som tilbyr TAF som utdanningsløp, og Fusa vgs. er ein av dei to.

– Per i dag er det ingen andre stader i landet ein tilbyr TAF-Restaurant og matfag, og derfor er det ekstra stas at me på Fusa vgs. kan gje dette tilbodet.

– Vi har fram til nå gitt tilbod om TAF innan mekaniske, -marine og -helsefag. Det at me nå også får TAF innan Restaurant og matfag, gjer at me får TAF- tilbod på alle yrkesfaga våre, fortel Nesheim.

Variert kvardag med fagbrev i siktet

TAF som utdanningsløp er det ei utdanning som gjev deg både fagbrev og studiekompetanse med fordjuping i realfag i løpet av 4 år.

Nesheim fortel at elevane er på jobb 2 dagar i veka, og er på skulen 3 dagar i veka dei tre fyrste åra.

– Det fjerde året er elevane på jobb 3 dagar i veka og på skulen 2 dagar i veka. TAF er eit svært populær utdanningsløp som gir mange fordelar på kort og på lang sikt. Dei får arbeidserfaring som gjer at dei lettare kan knyta teori til praksis. Dette gjer at dei får ein meir forståing for faget, som også gjer seg utslag i gode karakterar. Ein annan fordel som elevane set pris på, er at faga er organisert slik at dei får færre fag å forholda seg til på eit og same år.

Nesheim legg til at TAF-elevane ofte har ein fagleg fordel når dei tek til på høgare utdanning, og dei er ofte svært ettertrakta arbeidstakarar etter endt høgskuleutdanning.

Mange søkjarar - 30 prosent frå Os

– I alle år har TAF-utdanningane generelt hatt mange søkjarar og lange ventelister. Dei fleste elevane er lokale elevar og ca. 30 prosent av elevane kjem i frå Os.

Fusa vgs. har elevar frå 17 ulike kommunar og dei elevane som har lengst reiseveg bur gjerne på hybel halve veka.

Nesheim håpar det nye tilbodet vil bli godt motteke, og minnar på at fristen for å søkja vidaregående skule er 1.mars.