Her, på nordsida av Os Næringspark, opnar dørene til Lagersjefen Os i løpet av september. (Foto: Kjetil Vasby Bruarøy)

Fyller næringsparken med lager for utleige

Lagersjefen AS etablerer seg på Os med over 100 minilager i ulike storleikar.

image
Av: Kjetil Vasby Bruarøy

Lagersjefen AS blei etablert i 2013, som eit samarbeid mellom JOA Gruppen og Nagelgården AS, først i Fana og Sandviken, seinare også på Nordnes og i Bergen sentrum.

– Dei fire avdelingane i Bergen har fullt belegg, vi tenkte dette kunne vera noko for Os, seier Espen Aspenes i Os Næringspark AS.

– Her er alt frå små båsar til fjernarkiv til bedrifter til lager for heile flyttelass. Alt er tørt og trygt, ope frå klokka 6 til 23, med overvaking og alarm, og med god tilkomst på nordsida av Os Næringspark.

Huseigar har tatt investeringa med å innreia 540 kvadratmeter til det som blir Lagersjefen Os, mens det er kjeden som skal drifta lageret.

Bygginga var ferdig i går, i september er det venta at all teknologi er på plass og lageravdelinga kan opna.

Både firma og privatpersonar

Med lagerkapasitet frå 4-60 kubikk, utleige for ein månad om gangen og ingen bindingstid, kan Lagersjefen tilby fleksible lagerløysingar til ulike behov.

– Vi har innreia ein miks av storleikar i tråd med kva som har fungert i Bergen, men systemet er fleksibelt og areal kan justerast, seier Fredrik Sagen frå Lagersjefen AS.

I Os kjem 103 bodar. Dei 30 minste er på 4,5 kvm, dei 9 største er på 24 kvm.

– Kven er dei typiske lagerkundane?

– Det er fleire kategoriar. Vi har dei som skal ha vising for å selja huset sitt, som vil rydda og stabla vekk nokre ting, og vi har dei som treng ein ekstra bod og leiger permanent. Då er det ski og akebrett i lageret om sommaren og fiskeutstyr og hagemøblar om lagra om vinteren, forklarer Sagen.

Han er spent på korleis marknaden er i Os.

– Eg har inntrykk av at det er mykje som skjer i kommunen. Med bygging av mange leilegheiter kan det jo tenkast at enkelte saknar nokre ekstra kvadratmeter, eller vil ha eit rom for mellomlagring mens dei bur seg inn, så dei ser kva av dei gamle møblane dei vil bruka og kva dei vil kvitta seg med etterkvart.

– Er det noko som ikkje kan lagrast?

– Vi er naturlegvis streng på væske, kjemikalie og liknande, det skal vera tørt og trygt. Vi har hatt folk som har leigd lager til motorsykkel, men då måtte den tømmast for bensin før lagring. Elles er det privat og du låser deg inn og ut ved hjelp av ein app på mobiltelefonen.

Nesten fullt hus i næringsparken

Med etablering av Lagersjefen AS har Os Næringspark fått fylt rundt 85 prosent av det 3500 kvadratmeter store lokalet som Os Asvo flytta ut av då dei bygde nytt i Industrivegen.

– No har vi berre 300-400 kvadratmeter igjen som er ledig, seier Aspenes.

2Villa, 2Stabilise, Bildeprint/Fotolaben og Rørleggeriet Os, som i desse dagar er på flyttefot, er blant dei nyare leigetakarane i næringsbygget i Holtbrekka.

Fleire saker