Gamle stålskorsteinar kan vere brannfarlege!

Bjørnafjorden brann og redning gjennomfører for tida ei kartlegging og tilsyn ved alle hus og fritidsbustader som har ein stålskorstein av typen Selkirk, også selt som Jøtul stålpipe.

– Denne skorsteinstypen har vore involvert i ei rekke alvorlege brannhendingar nasjonalt dei siste åra. Vi ønsker å førebygge slike brannar i kommunen vår, seier Arne Rødberg, leiar for førebyggande.

Isolasjonsmateriale inne i røra som dannar skorsteinen, har i mange tilfelle blitt forringa med åra, slik at skorsteinen ikkje har same isolasjonseffekt som då han var ny.

– Dette kan føre til at sjølv vanleg bruk av fyringsanlegget kan skape strålevarme som i verste fall kan antenne bygningskonstruksjonar, eller antennelege gjenstandar som står lagra inntil skorsteinen.

Skulle det oppstå ein sotbrann i ein defekt stålskorstein, vil det kunne ha kritiske følger.

Skorsteinen blei produsert mellom 1970 og 1999, og selt fram til rundt 2005 i Norge.

Han hadde berre 10 års garanti, og forhandlar av skorsteinane anbefaler i eit eige informasjonsskriv at ein skiftar skorsteinane då ein ikkje lenger kan garantere for tryggleiken ved bruk av dei.

Brannvesenet har registrert i underkant av 200 slike skorsteinar i Bjørnafjorden kommune, og eigarane vil i vekene som kjem få besøk av brannførebyggarar som undersøker at desse ikkje utgjer ein umiddelbar trussel eller fare for brann.

– Dersom du veit at du har ein slik skorstein, men ikkje mottar ei melding frå brannvesenet om at dei kjem for å sjekke denne, må du ikkje nøle med å ta kontakt med brannførebyggande avdeling!