Går baklengs til Søfteland

Søndag kveld er siste innspurt i avstemminga over kven som skal bli Bergens Beste i ulike kategoriar.

Innan beste band og beste festival er Os representert, ORBO & The Longshots som beste band og Søfteland Rock N LoL som beste festival.

Begge har leia avstemminga, men korleis dei ligg an no er uvisst, for BT.no har fjerna grafane som viser førebels resultat.

– Eg slår eit slag for Søfteland og går baklengs frå Os Rockeklubb på Kuventræ til festivalområdet på Sanden på Søfteland om Rock N LoL vinn, seier leiar i Os Rockeklubb, Kjetil Grønvigh.

– Mange vil nok kalla meg kraftig inhabil, men eg vil likevel seia at Andreas og William Lindborg verkeleg fortener denne prisen. Dei har skapt ein festival som både viser komande, nye og etablerte band på ein stemningsfull festival som både er profesjonelt gjennomført og sjarmerande personleg i stilen. Publikumstalet veks frå år til år og band etter band bryt gjennom etter å ha vist seg på Sanden på Søfteland.

Har gått baklengs før

Han kallar seg sjølv lite atletisk og håper underhaldningsverdien i å sjå ein trommis gå baklengs er høg nok til at endå fleire stemmer, og at endå fleire finn fram ungane sine telefonar for å gje ekstra mange stemmer til eldsjelene frå Søfteland.

Men heilt ukjent med å gå baklengs er han ikkje.

– Eg gjekk Ulvenmarsjen baklengs då eg gjekk på ungdomsskulen. Saman med eit par andre. Det var vondare enn tremila i militæret, så eg veit at også turen frå Os til Søfteland bli smertefull.

Kjetil finn trøyst i at samburen, Aina Særvold Sælen, har sagt at ho vil gå saman med han. Også ho vil gå baklengs.

– Men også andre kan slenga seg på, det er berre kjekt om vi blir ein gjeng, seier Grønvigh.

Her kan du lesa meir om Bergens Beste og stemma på dine favorittar.