Går i lufta for Os-songen

Bildeserie:

1 av 6

Det nærmar seg slepp av nyinnspelinga av Song til Os. Artistdugnaden er nesten over, onsdag går alle lydspor til miksepulten – parallelt er det innspeling av video til låta.

– Vi har hatt tre dagar med filming og eg reknar med at det er fem igjen, seier prosjektleiar Carina Blålid.

Fredag var filmteamet med nokre av musikarane og vokalistane i Lyse kloster-ruinane for å spela inn.

– Eg føler meg veldig heldig som har fått med både Varde og Bjørø til å ta dette på dugnad, dei er både dyktige, effektive og har utruleg fin humor, synest ho.

Morfaren sin melodi

Regissør Rolv Lyssand Bjørø, som i vinter hadde ein kortfilm som forfilm til Interstellar, og i juni hadde neste prosjekt vist på Bergen Kino, har eit ekstra tett band til Os-songen.

– Dei fleste i Os har sikkert kjensler for låta. I tillegg er det litt personleg for meg å laga video til ein melodi morfar har skrive. Eg synest det er eit veldig fint initiativ og ei utruleg flott samatsetting av artistar som er med på dette.

– Det er også med ein porsjon ærefrykt eg takka ja, først til å hjelpa til, så til å ta regien saman med Anders Fløysand frå Varde. Vi skal visa god stemning og ikoniske plassar i Os, og vi har plass til mykje, men ikkje til alt.

– Samtidig gjer vi dette på dugnad innanfor ganske korte tidsrammer.

Lærerikt samarbeid

Både Bjørø og Fløysand har vore i filmbransjen i fleire år, men osingane har ikkje jobba saman før.

– Varde imponerer meg. Både duoen med fotograf Anders Fløysand og dronepilot Øystein Skorpen, og det utstyret og kompetansen dei har bygd opp.

– Eg har jobba lite med drone før, så dette blir ein ekstra lærerik sommar for min del. Samtidig er det kjekt å bli kjent med filmfolk i eigen heimbygd.

Nye perspektiv

Varde har dei siste åra spesialisert seg i fleire retningar, og har med Varde Solutions som paraply delt verksemda i fire grupper; film og media, aerial (drone), fotostudio og dynamics (teknologi).

Med fleire store, profesjonelle dronar - og alle nødvendige lisensar og forsikringar for kommersiell drift med RPAS, har dei blant anna hatt fleire oppdrag for BBC.

– Drone er ikkje berre eit godt verktøy når du skal ta flyfoto, i mange samanhengar er det eit godt alternativ til kran. Det er ikkje alltid vi flyg høgt med dronen, seier Anders.

– Men til Os-songen blir det ein del flott bilde frå lufta, og dronepilot Øystein har vore litt i seglfly over Os, og veit om perspektiv og vinklar der Os tar seg ekstra bra ut.

– Tida er knapp fram til lansering på Osfest, men eg håper vi skal få gjort mange og gode nok opptak til at videoen står til den fine songen, seier Fløysand.