Går i pluss, klare for ny festival

Framleis manglar framleis den endelege oversikta, men konklusjonen er likevel klar.

– Alt tydar på at vi går mot eit lite pluss.

– Framleis manglar vi nokre fakturaer og oppgjer, mellomanna frå Billettservice, så dei endelege tala blir nok ikkje klare før litt seinare i haust, fortel festivalsjef Tor Egil Hylland.

1100 x 2

Tala frå festivalen slik dei ser ut no syner at det blei seldt omlag 1100 festivalpass for to dagar til sponsorar og publikum.

– I tillegg er vi omlag på det same når det gjeld dagspassa.

– Så langt eg kan sjå no, så tydar det på at vi hadde nesten dobbelt så mange dagsbillettar på laurdagen, samenlikna med fredagen.

Cruisa svikta

Sjølv om festivalsjefen er nøgd med dei totale tala, vêret tatt i betraktning, så er det eitt av arrangementa som skuffar.

– Cruisa blei ikkje slik vi hadde håpa og trudd.

– Vi hadde vel omlag 480 totalt på desse, så dei blir isolert sett, eit tapsprosjekt for oss.

– Enkelte cruise var veldig bra og fulle, medan andre var det alt for lite på. Vi må sjå kva vi gjer i høve dei til neste år.

– Var gresk for oss

Eit av områda som gjer at Hylland ikkje har den endelege oversikta enno er mellomanna salet av mat og drikke og reklameplassar.

– Her er det inngåande og utgåande moms som gjer det vanskeleg å få oversikten før alle fakturarer og kreditnotaer er ført.

– Det er jo eit vel av forskjellige reglar i høve kva og kor mykje som skal reknast, så det tek litt tid.

– I tillegg var det å skulle berekna mengde mat og drikke meir eller mindre gresk for oss før festivalen.

– Vi selde 2500 liter øl, omlag halvparten av det vi tok inn. Eg trur salet var omlag det same på dei andre drikkevarene òg.

– Heldigvis er dette ting vi får returnert, så vi slepp brenna inne med det.

– Burgarane til Silvio gjekk det veldig bra med, pølser og is var ikkje folk like sultne på, fortel Hylland med eit smil.

3750 regnponsjoar

Hylland sit med eit inntrykk av at dei klarte å tenkje på det meste før festivalen.

– Eg kan ikkje seie at det er noko eg opplever vi hadde glømt før det heile braka laus.

– Regnponsjoane kom på plass i siste liten då vi såg at det var fare for regn.

– Der fekk vi 750 frå Egon til fredagen som vi delte ut sjøl. På laurdagen kom dei med 3000 til pluss folk til å dela dei ut, så vi kom greitt i mål der òg.

– Eitt område vi bomma på var talet på toaletter. Der overdimensjonerte vi behovet, men det var jo ikkje det verste vi kunne gjera.

– I tillegg ser vi at vi må gjera noko med skilitinga på salstelta. Dei må òg bli enno tydelegare til neste år.

Datoen rimeleg klar

Festivalsjefen er ikkje skremt av ei hektisk helg og månader med detaljplanlegging.

– Nei, vi er allereie i gang med å planlegga festivalen for 2015.

– Vi har framleis litt evaluering igjen, med samarbeidspartnarane våre, som kommunen, politiet, Solsiden og Peppes.

– Men med svært stor sannsynligheit blir det same helga som i år, nemleg første helga i august, så det er berre å halde av den helga, seier Hylland, som røper at dei har fleire justeringar dei vil gjera, utan at han vil koma inn på dei allereie no.

– No er vi i gang. Vi har teke mange investeringar i år som vi vil nytta godt av til neste år.

– Det gjer at vi kan nytta nokre av ressursane til å laga eit enno betre program.

– Ikkje minst har vi skaffa oss god og verdifull erfaring for å laga ein enno betre festival om eitt år, avsluttar Tor Egil Hylland.