Går Ulvenmarsjen for 40. gong

Feirer at Ulvenmarsjen er førti år: Seks personar har gått alle dei 39 første.

Ottar Skarstein er ein av dei seks som har gått alle dei 39 første marsjane. Her under fjorårets marsj (foto: Christina Forstrønen Bruarøy)
Andris Hamrefredag 20. apr. 2018 11:49

I år er det 40. gong Ulvenmarsjen blir arrangert. Primus motor Erling Andersen reknar med at alle dei seks som har gått dei 39 første marsjane stiller på startstreken også i år.

– Dei er alle oppe og går, og eg har ikkje fått signal om at dei ikkje stiller, så eg reknar med at vi kan gjera litt ekstra stas på alle seks når dei kjem i mål. Dei vil få ei spesiell utmerking, fortel Andersen.

– I tillegg har vi ein god gjeng som skal få utmerking for å ha gjennomført 25, 30 og 35 marsjar om dei fullfører også i år. Vi har òg nokre som skal få krus for å ha gått 20 gangar. Det blir markering av både deltakarane og at vi no har helde på i 40 år.

Trekk 15 gåvekort

Ei av markeringane er at det i år blir trekt 15 gåvekort blant dei som har seks rette på kunnskapskonkurransen.

– Som dei seks sju siste åra har Jarle Aspaker laga oppgåver som folk skal få bryna seg på gjennom løypa. Eg har hørt rykter om at dei ikkje blir så vanskeleg som i fjor, men dei skal framleis ikkje vera googlebare, smiler Andersen.

– Søndag, etter at vi er ferdig med arrangementet trekk vi gåvekorta som vi har fått frå annonsørane våre. Eg må få retta ein stor takk til alle som har annonsert i avisa vår, uten dei så hadde det nok ikkje blitt noko av Ulvenmarsjen. Deltakaravgifta dekker nemleg berre såvidt premiane.

– I fjor var det snaut 400 deltakarar, kor mange håper de på i år?

– Vi håper vi skal vera tilbake der vi var åra før med mellom 400 og 500 i løpet av dei to dagane. Det bør vera såpass for at vi skal få det til å gå rundt.

Godt gangvêr

Vêrmeldingane varslar sju til ni grader og stort sett opphaldsvêr.

– Det er eit yppeleg vêr for å vera i aktivitet i. Ikkje for varmt og ikkje for kaldt, så i år bør ikkje vêret vera ei unnskyldning for ikkje å gå Ulvenmarsjen. Er det sol og fint, så vil folk heller halde på i hagen. Det treng dei ikkje i år.

Ønskjer fleire med

Det er Søfteland Turn & Idrettsforening som står bak Ulvenmarsjen.

– Vi er jo stort sett den same gjengen som arrangerer. Eg kunne ønskt meg at vi hadde fått inn litt nytt blod, både for å sjå på arrangementet og for å sjå med nye auge på korleis vi marknadsfører oss. Om det er nokon som kunne tenkje seg å vera med, så er det berre å ta kontakt med oss i løpet av helga.

– Til dei som har gått tidlegare så har eg ei ekstra oppmoding. Ta med ein ven eller to ekstra, så blir turen enno kjekkare, avsluttar Erling Andersen.

Om Ulvenmarsjen

Start og mål: Os ungdomsskule
Lengde: 14 km frå ungdomsskulen nord langs Byvegen, via Industrivegen, Ulven, Skeie og Moberg til ungdomsskulen
Start: Laurdag frå klokka 14, søndag frå klokka 10.
Første gong arrangert: I 1974 av dåverande Moberg IL, kun med konkurranseklasse. I perioden 1979-1987 gjekk løypa motsatt veg av kva den gjer i dag.
Rekordår: 1982 med 1220 deltakarar
Påmelding: ved start, arrangøren tek Vipps

Spennande? Vil du ha ukas høgdepunkt i innboksen?

Les meir om

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.