midtsiden

Gaselle doblar igjen

Gasellebedrifta Johs Sælen & Sønn AS veks med rekordfart. 2009 blir dobbelt så bra som fjoråret.

image
image
image
image
Av: Kjetil Vasby Bruarøy

Johs Sælen & Sønn AS er ei av årets 12 gasellebedrifter frå Os. Med auke på 119 prosent frå 2005 til 2008 hamna smeden på 329. plass i Hordaland. I år ligg dei an til ei dobling i forhold til fjoråret.

- Vi har passert 18 millionar kroner, seier Tore Sælen når det står knappe to månadar igjen av 2009.

Stor Bybane-kontrakt
I fjor omsette smeden for 9,5 millionar kroner. I år ligg dei an til dobling, i hovudsak takka vera ein ordre på venteskur til Bybanen på rundt 9,6 millionar kroner.

- Vi skal levera siste skur innan februar 2010, men mesteparten blir bygd og levert i år.

Til saman 29 venteskur (170 tonn med stål), frå dei minste som er cirka 12 meter lange til dei som skal i sentrum og på Nesttun, som er 31 meter lange.

- Vi har opsjon på neste stykke òg, frå Nesttun til Lagunen. Kor tid det blir levering frå oss til dette strekket er førebels uvisst, seier Sælen.

Fleire store - og nokre små
Sælen har også fått fleire andre store kundar, som NCC, som dei bygger stålkonstruksjonar for. I tillegg har dei små bedrifter og privatpersonar, også i Os, som kundar.

- Vi sel rekkverk og glasverk i aluminium og rustfritt stål, fortel Tore.

Frå 5 til 14 tilsette
I 2008 var det 5 tilsette ved bedrifta, i år er det 11. I tillegg har dei leigd inn 3 mann.

- I starten var det vanskeleg å få tak i folk, men no har vi fått ein god gjeng til å ta hand om den aukande oppdragsmengda.

- Det er for trongt for oss her, så vi håpar på å nygga nytt neste år. Vi har sendt nabovarsel på planane våre i Hegglandsdalen, fortel Bjørn Sælen.

Frå 400 til 2000 kvm
Johs Sælen & Sønn er ein av dei tre største eigarane av det nye industriområdet i Hegglandsdalen. 4,5 av nesten 10,7 mål er ferdig planert.

Her har Sælen planar om å bygga eit stålbygg med 60 meter lang og 26 meter brei verkstad og 26 x 10 meter med kontor over to etasjar.

Blir det byggestart i 2010 kan den veksande bedrifta flytta frå 400 kvaratmeter til nærmare 2000 kvadratmeter eit stykke lengre inne i Dalen.

 

Fleire saker