Kjente gatekunstnarar tok i går deltakarar tilknytt Vartun ut på «grafitti-jam» i bakgarden. (Foto: Kjetil Vasby Bruarøy)

Gatekunsten på Vartun tar form

15-20 deltakarar står side om side med kjente kunstnarar frå Noreg og Russland.

image
image
image
image
image
image
image
image
image
image
image
image
Av: Kjetil Vasby Bruarøy

Vartun oppfølgingsteneste, som både er døgnbemanna bufellesskap med 14 leilegheiter for rusavhengige, og følger opp andre rusavhengige i Os kommune, er godt i gang med gatekunstprosjektet sitt.

Prosjektet skal leia til utstilling i Vognhallen førstkomande måndag, men først er det utsmykking av Vartun, tur til Pushwagner-utstillinga i Bergen (i dag) - og kursing av deltakarar.

Etter å ha etablert kontakt med gatekunstnarar i Bergen har dei bestilt fire verk innandørs og to ute.

• Les òg: Gatekunstnarar omfamnar Vartun-prosjekt

Kunstnarar som deltar: Tegson, AFK, RC (Rodrigo Cortez), Dickey198 frå Russland, lille.Oslo og eyf_bef.

Fredag malte AFK, mannen bak det kjente Listhaug-maleriet, ein vegg i entreen før han skulle på reise. Resultatet ser du i bildeserien over. Same dag starta RC (Rodrigo Cortez) på ein vegg i ein trappeoppgang.

På initiativ frå kunstnarane er også dei som bur på Vartun, og andre som får oppfølging av Vartun, invitert til å få opplæring og til å delta. Måndag var dei i gang, leia av Tegson.

Å få maling på fingrane

Tegson tok innleiinga innandørs, der han fortalte si personlege historie før han introduserte deltakarane til sprayboksen.

– Vi kom oss fort ut. Det viktigaste er å koma i gang, å få maling på fingrane. Det var ingen som heldt foredrag før eg starta, eg berre starta, seier Tegson til Midtsiden.

Så demonstrerer han ulike teknikkar, viser effekten av ulik avstand mellom sprayboks og vegg, og kva som kjenneteiknar hans eigne verk.

Ein sirkel med markert ytterkant blir laga med stødig hand og ein rask tvist på handleddet, prikkane blir laga ved å spraya i ein kopp og kasta på veggen.

Side om side i bakgården står ei rekkje med deltakarar. Fleire av dei har allereie fått teken på det.

Frå Petrozavodsk til Os for å dekorera Vartun

Mellom kursdeltakarane står ein ung mann og sprayer «Bergen» på veggen. Dickey198 kjem frå Russland, eins ærend til Os for å dekorera Vartun.

– Eg har deltatt i eit prosjekt i Harstad for ei stund sidan. Dette er andre gong eg er i Noreg. Då Tegson fortalte om prosjektet sa eg ja med éin gong.

Fleire kunstnarar sa ja, og Vartun har valt ut dei som har ein stil dei sjølv meiner passar ulike stadar på og i bygget.

Dickey198 kjem frå Petrozavodsk, ein by som ligg 400 km aust for St Petersburg og har rundt 300.000 innbyggarar. Han skal dekorera den eine ytterveggen.

– Eg ventar til det blir mørkt, for eg vil prosjisera ideen min på veggen. Den er laga til dette oppdraget mitt, og består av ei mengde ulike nøklar. Nøklane skal symbolisera dei ulike vala vi tar, bruk av ulike nøklar opnar ulike dører til framtida, forklarer Dickey198.

Ei trapp til indre fred

Innandørs i trappeoppgangen byrjar prosjektet til RC verkeleg å ta form. Eit hode med eit kvinneansikt i bakhodet, eit tempel på skrå, og eit hjarte. Ikkje eit hjarteforma hjarte, men eit realistisk.

RC teiknar for fri hand, i starten med ein blyant teipa fast på eit kosteskaft. Imponerande stødig når vi ser formen verket hans har tatt.

– Sjølv om eit hjarte som heng i lause lufta kan sjå brutalt ut, handlar verket om å finna fred. Mange har ein stad eller ein person som er ein referanse, ein stad dei får fred, eit privat tempel, forklarer RC.

– Eg ønskjer å spela på trappene, det å vera på veg til ein god plass.

I dag er deltakarane på veg til Pushwagner-utstilling i Bergen. I morgon står samtidskunst på plakaten. Resten av veka blir det workshop til salsutstillinga i Vognhallen.

Fleire saker