Gav benk i gåve i jubileumsåret

Søre Øyane Sanitetsforening er del av Norske Kvinners Sanitetsforening (N.K.S), som i år har 125-årsjubileum.

NKS markerer med «omvendt bursdagsfeiring», ved å gi gåver til andre. Frå sentralt hald er det delt ut 3000 kroner til kvar foreining som dei kan gi vidare til gode, lokale formål.

– Det er mykje å velja i, hos oss blei det ein benk på Tongane (Sundøytangen), seier leiar i Søre Øyane Sanitetsforening, Bente Arentzen.

– Folk går på tur både til Kobbavågen, Fyret og Tongane. Det er nokre benkar der frå før, og vi har inntrykk av at dei er mykje brukt. No er det betre plass, og vi håper turgåarar i alle aldrar har glede av desse sitjeplassane ved den fine utsikta over fjorden.

I Bjørnafjorden kommune er det fem foreningar.

125-årsdagen var fredag 26. februar. Då fortalte vi om foreiningane i Os og på Søre Neset som slo seg saman, la til nokre kroner frå eige lag og gav 10.000 kroner til Ung Arena.