midtsiden

Gav blekksprut i gåve

Tysdag fekk hobbyfiskarar frå Os ein åttearma blekksprut utanfor Solstrand. No bur den på Akvariet i Bergen.

image
image
image
image
image
image
image
image
Av: Kjetil Vasby Bruarøy

– For rundt ei veke sidan klatra den einaste blekkspruten vår ut av akvariet og døydde. Derfor var det heilt utruleg at ein gjeng frå Os ringte oss med ny blekksprut allereie etter nokre dagar, seier dyrepassar Frits Martem hos Akvariet.

Det var tysdag i førre veke at ein gjeng hobbyfiskarar fekk den åttearma blekkspruten i ei hummarteine som sto utanfor Solstrand.

Bestemte namnet

– Vi er ein gjeng som fiskar i lag og det var Lasse Evensen og brørne Torbjørn og Jan Eirik Tvedt Skjeldal som drog teina. Då dei kom til land var vi fleire kameratar som samla oss rundt sjøvasstanken i naustet og såg den livlege blekkspruten symja rundt, fortel Ole Christian Brekke.

Ein av dei foreslo å ringa Akvariet og tilby dei å overta blekkspruten.

– Vi er ei stifting og har ikkje sjanse til å fiska sjølv. Derfor er vi veldig glade for slike gåver, og det er mange ulike artar vi er interesserte i, seier Martem.

Einaste vilkåret fiskarane hadde var at dei skulle få gje namn på blekkspruten.

– Den heiter «Teigen» og er oppkalt etter ein stødig medeigar på festflåten vår, «Vikingfjord», forklarar Brekke.

Blekkspruten lever blant anna av krabbar. Den suger seg fast og bruker nebbet til å bora seg gjennom skalet. Den kan også knusa krabben for å få i seg kjøtet.

Djupvasskrabbe og hummarbaby

Midtsiden fekk vera med dyrepassaren på bakrommet og der viste han fleire spesielle artar og gåver frå hobbyfiskarar rundt Bergen.

– Denne djupvasskrabben, for eksempel, er ei fersk gåve frå ein fiskar frå Sotra.

Nokre få av artane er «eigenproduserte».

– Denne hummaren er fødd her på akvariet. Eg lurer på om ikkje det er første gong ein så liten hummar er observert, det er uansett sjeldan og den minste eg nokonsinne har sett.

Fleire artar frå Os

Ute i akvaria som er opne for publikum er det andre enn Teigen som kjem frå Os.

– Vi har fått nokre fløyfisk frå Os. Dei liknar litt på fjesing og ligg i same akvarie som fjesingane, seier Frits og viser.

– Men blekksprutar er ganske sjeldan vi får, og ein sånn åttearma er vi veldig glad for. Vi har hatt akkar i akvariet. Akkar går i stim og vi hadde ein heil stim, men dei er vanskelege å få til å leva lenge.

Med Martem er tydeleg på at Akvariet er veldig takksame om folk vi gje frå seg fisk, skaldyr eller skjel som dei finn.

– Det er berre til å halda dyret i live og ta kontakt med oss, mange artar er interessante, seier han.

 

 

Fleire saker