Gir «politikar-løna» til frivillige lag

Tysdag formiddag la medlem i Tenesteutvalet og 2. varamedlem til kommunestyret for Høgre, Susanne Sperrevik, ut følgjande melding på facebook:

«I dag har jeg fått min første "politikerlønn" fra Os Kommune. Med kun et verv så blir det ikke så mange kronene, men noen tusenlapper blir det nå utbetalt. Min plan er å gi disse pengene til en lokal organisasjon i Os som driver aktiviteter for barn og unge. Noen som har tips? Kun henvendelser i kommentarfeltet tas i betraktning, og der er det fint om det blir gitt en veldig kort begrunnelse. (Jeg ønsker primært ikke å støtte fotball eller andre religiøse aktiviteter).»

Forslaga og reaksjonane let ikkje vente på seg; i løpet av tysdagen fekk ho 39 kommentarar og forslag på statusen.

– Hadde berre lyst

Honoraret frå kommunen er på rundt 5000 kroner, har lokalpolitikaren rekna seg fram til.

– Eg hadde ikkje ein spesiell grunn for å gjera dette. Eg hadde berre lyst.

– For meg er det å driva politikk ein hobby og eit frivillig arbeid. Eg forstår at dei som har det som jobb ikkje kan gjera det same, men når eg blei vald inn, så hadde eg lyst til å gje desse pengane vidare, fortel Sperrevik.

Vanskeleg val

Sperrevik, som er på ferie saman med mannen sin, fortel at det blei vanskeleg å ta valet.

– Det var så mange gode forslag, så etter at eg om mannen min diskuterte det fann vi ut at vi ville legga litt ekstra i potten og gje 5000 kroner til fire ulike organisasjonar.

– Vi hadde eit ønskje om å gje det til formål våre eigne ungar ikkje har trengt å nytta seg av, forklarer Sperrevik.

Dei fire laga som får 5000 kroner kvar, og som ikkje veit om det enno, er BARK (Røde Kors sitt gratistilbod til barn og unge mellom 5 og 12 år), Landsforeninga mot stoff, Ups & Downs og Frivilligsentralen.

– Eg ser på statusen at det er mange som har foreslått Trivselsstallen i Lysefjorden i og med at eg sjølv er frå Lysefjorden. Til dei som no får pengane, som håper eg dei kan bruka dei til ein aktivitet hos Trivselstallen for barn og unge. Då kan jo pengane komma til nytte meir enn ein gong. Eg skal ikkje pålegga nokon å gjera det, men det er ei lita oppmoding, avsluttar ho.