Gjekk 375 «toppturar» i sommar

Bildeserie:

1 av 6

Frå 1. juli til 1. september har det vore topptur-konkurranse på Luranetunet. Seks avdelingar har konkurrert i å gå flest turar til naboavdelingane, der det har hengt både bilde av lokale fjelltoppar og turbøker som dei kan skriva seg inn i.

Til saman er det gått 999 turar desse tre månadane! Behandlingsavdelinga har vore mest på farten og fekk i dag premie for sine 375 turar.

– I løpet av denne konkurransen er det mange som både har vist både konkurranseinstinkt og stor turglede. Nokre har møtt kjente som dei ikkje har snakka med sidan dei gjekk på skule saman, fortel leiar for vinnaravdelinga, Kari Breivik Johnsen.

– Mange har kvidd seg for å bevega så mykje på seg, andre har ikkje funne påskot til å besøka andre avdelingar. Barrierar har blitt brotne som resultat av konkurransen, fortel kollega Anne Bratholmen.

– Enkelt å gjennomføra

Aktivitetskoordinator og nestleiar i kultureininga i Os kommune, Grete Byrkjeland, er glad for at ideen blei så godt mottatt.

– Eg har lest og høyrd om mange ulike tiltak, men denne var så enkel å gjennomføra og å organisera, og i ei bygd som Os der så mange har glede av fjella, tenkte eg at det ville passa godt inn.

Premien var ikkje ein tursjokolade, men ei heil kake.

– Eg kjøpte den største eg fann i Os, ei kvit dame som eg henta på Hagavik Hjemmebakeri i dag, fortalde Grete før ho las diktet «Dei norske fjell» av Ivar Aasen.

Tok andre med seg

Avelinga pleie og miljø, i etasjen under, kom på 2. plass med 235 turar, og blei invitert opp for å smaka på kaka.

– Det viktigaste er ikkje å gå så ofte eller å gå så langt, men å vera i meir aktivitet. De har motivert kvarandre og de har inspirert andre, sa Grete til vinnaravdelinga før ho òg delte ut diplom.

Både frå 10.30 til klokka 13, om ettermiddagane og i helgene har turaktiviteten vore høg mellom avdelingane på Lurane.

– Fleire har tatt andre med seg på tur, dette med å skriva seg inn i turbok, og konkurransen i seg sjølv, har vore ei drivkraft.

– Likte meg på Hardangervidda og på Møsnuken

Ein av dei som har vore ivrig på å køyra og å gå på tur er Erling Hjertholm.

– Det har vore veldig kjekt! Då eg var yngre og då kona mi levde var vi ofte på tur. Eg likte meg veldig godt på Hardanervidda, men vi gjekk òg på turar her i Os. Eg hugsar godt ein fredag eg og kona tok med telt og overnatta på Møsnuken. Det er fint å vakna på fjellet, synest Erling.

Dei tilsette ved Luranetunet er imponert over tur-historikken til fleire bebuarar.

– Dei har levd eit langt liv, men det er ikkje alle vi veit så mykje om. I denne topptur-tida har vi snakka mykje om turar, og fleire av dei har jo vore på fjell i inn- og utland som eg ikkje har høyrd om før.

Ekteparet Alvhild og Olav Haugland har òg hatt glede av topptur-konkurransen, men då dei var yngre var det andre turar dei likte betre.

– Eg liker meg best i båt, men det blir ikkje så mykje tid på fjorden no lenger, seier Olav.

– No har vi i staden tatt oss fleire turar for dagen her på Luranetunet, og det har vore kjekt for oss begge.

Det er ikkje lenge til neste aktivitet på Luranetunet, tysdag er det moteshow!