– Gjekk i eitt utover natta

Bildeserie:

Full skjerm

1 av 6

Allereie før «Lena» sette inn som verst måtte brannvesenet rykka ut.

– Vi fekk melding om brann i ein bosslekter mellom Øyane og Halhjem.

– Vi rykte ut med to mann i båt for å sjå til den. Då var vêret greitt i høve å koma seg utpå, fortel brannsjef Stein Gjøsund.

Mista sambandet

Brannsjefen fortel at dei fekk testa dei interne rutinene då dei mista sambandet og telefonkontakten med operasjonssentralen på 110.

– Vi fekk etablert samvirke med politiet lokalt, noko som gjorde at eg føler vi hadde grei kontroll.

– Fungerande ordførar blei også orientert gjennom natta, så den lokale beredskapen fungerte, trass manglande kontakt med byen.

Tre over to hus

Brannvesenet fekk melding om, og rykte ut til, ti oppdrag knytta til trevelt.

– To av dei var tre som hadde velta over hus, eitt i Nordmarka og eitt på Søfteland.

– Husa blei ikkje skadd, med trea blei liggande over taket. Det blir no ei oppgåve i samarbeid med forsikringsselskapa og profesjonelle trefjernarar å få dei ned på ein trygg og sikker måte.

Kvinne sperra inne

– Verre gjekk det med eit hus på Haugsneset, kor greinar frå eit digert tre fell ned på taket til nabobustaden.

– Ei kvinne ringte oss og var skremt.

– Greinene hadde skada taket, og seila ned framfor inngangane på huset, så ho var innesperra.

– Vi rykte ut dit og fekk fjerna greinane slik at ho skulle komma seg ut. Det har nok vore dramatisk for nokra av innbyggarane våre, seier Gjøsund.

Tre over veg

Både på Hatvikvegen og Eidsvegen velta tre over vegen.

– På Hatvikvegen la det seg over straumledningane og sperra vegen.

– Vi fekk kappa treet, slik at vegen blei open igjen, men framleis er det arbeid som står att der ute.

Oppdraga til brannvesenet var spredd over mest heile bygda.

– Eineste området eg ikkje har registrert noko er ute i Askvik og Strøno. Det kan sjå ut som om dei har lagt litt i le.

Kvinne skadd

Brannsjefen har berre fått éi melding om personskader etter stormen.

– På Søfteland blei ei tysk kvinne tatt av vinden då ho gjekk ut av bubilen ho budde i.

– Ho slo hovudet borti eitt eller anna, som gjorde at ho måtte ein tur på legevakta og få sydd nokre sting.

Tøft i båthamna

Isolert sett er det truleg båthamna framfor Oseana som har hatt det tøffast.

– Den nye brygga inne ved den lille parken der ute, blei øydelagt og løsna.

– Vi fekk sikra den med tau, så den er trygg no, men nokon må jo ta seg av den. I tillegg fekk fleire av skiferhellene skader.

– Godt er det å sjå at båteigarar tok oppmodinga om å sikra båtane sine. Det var høg aktivitet i hamna, kor folk kom med fendarar, tauverk og andre ting for å sikra båtane.

– Fram til i to - halvtre-tida hadde vaktlaget hendene fulle, men vi fekk hjelpt alle som trengte det, avsluttar brannsjef Stein Gjøsund.