Gjekk opp to vektklassar - gjorde reint bord

Os Håndbakklubb stilte med åtte deltakarar i NM, som i dag blei arrangert i Skedsmokorset.

– Det var 83 deltakarar jamt fordelt på klassane, så det blei ein god og tøff meisterskap, seier Frode Veim Haugland.

Sjølv fekk han det ekstra tøft, då han gjekk opp to vektklassar for å unngå å konkurrera mot klubbkameratar.

– Eg hadde ikkje trudd eg skulle vinna, men dei var litt treige i + 105 kg, så eg fekk kanskje litt fordel av fart og teknikk.

Kravet for å delta i tyngste klasse er at du må vera minst 95 kg. Frode vog seg inn med sko og jakke på, og klarte akkurat kravet.

Han tok gull med både venstre og høgre arm i debuten i tungvekt, og er no oppe i i alt 28 NM gull.

Rønhovde sitt første gull

Dei andre frå Os som blei noregsmeister i dag er Dan-Jarle Køhler Raustein, Ronny Bruarøy Risøen og Per-Christian Helland Rundhovde.

– Rundhovde vann nest tungste klasse, - 105 kg høgre arm. Dette er hans første NM-gull, i fjor blei det bronse. Han er sterk, men ikkje så erfaren, så det kan bli fleire gull på han i åra som kjem, spår Frode.

Dan-Jarle, som fekk sølv og bronse i fjor, klatra til gull (høgre) og sølv (venstre) i - 65 kg i dag. Dette var hans femte NM-gull i karriera.

Ronny B. Risøen vann klassen - 95 kg høgre arm. Også han har vunne NM fleire gongar før.

Nest beste klubb

I tillegg til NM-titlane blei det tatt fire medaljar. Dan-Jarle sitt sølv, Tore Matre med bronse i - 95 kg og Øystein Brakstad med 2 x bronse i - 65 kg.

Eivind Bøe Johannessen (-65 kg) og Lars Holen (- 75 kg) hamna begge på 5. plass i sine klassar.

– Vi blei ikkje beste klubb i år, samla sett måtte vi nøya oss med å bli nest beste klubb i NM.

Kan vinna pengar i Chicago

Neste gong Frode skal bryta er allereie i mai.

– Då er det WAL igjen, TV-sendt frå Chicago på 17. mai.

– Denne gong får eg sjanse til å vinna pengar for første gong. I tillegg til at eg får dekka fly og opphald, og 1000 dollar for å stilla, vinn eg 2000 dollar om eg vinn kampen, fortel Veim Haugland.

Kampen går mot amerikanaren Mike Selearis.

– Eg har gått mot han før, i Las Vegas. Då vann eg, men det var ein seig kamp, fortel Frode.