Gjev ballar til Brasil

Gutelaget til Os, som blei kretsmeistrar i fjor, tel rundt 50 spelarar. Over helga reiser dei til mannssterke med tre lag til Nesbyen for å førebu seg til årets Norway Cup.

Bjørn Mjelva, som er med og trenar gutelaget, har ekstra mykje bagasje med seg.

– Takka vera gåvmilde sponsorar, bedrifter som i hovudsak kjem frå Os, har eg med meg 100 fotballar som eg vil gje til Tommy Nilsen sitt fantastiske prosjekt i Rio de Janeiro, seier Mjelva.

Frå slummen - med favorittstatus

Nordmannen Tommy Nilsen driv Karanba, eit sosialt prosjekt der han med fotball som verkemiddel får ungar og ungdom vekk frå gatene i Rio og inn i ein sunnare livsstil.

NRK har hatt ein TV-serie om prosjektet, her kan du sjå alle episodane.

– Det kjem lag frå mange nasjonar til Norway Cup. Nokre av dei er akademi, samling av dei største talenta i regionen eller i landet dei kjem frå.

– Karanba er annleis, dei kjem frå gatene i Rio, men er likevel så fantastisk gode, seier Mjelva.

Ikkje berre ein idrett

Den litt over snittet fotballinteresserte Bjørn Mjelva legg ikkje skjul på at fotball betyr meir for han enn berre trening og resultat.

– Eg har personlig erfart at fotball er noko som kan henta fram det beste i folk og at fotballen kan vera fantastisk god å ha, ikkje minst i tunge stunder.

Då Bjørn mista begge foreldra sine i løpet av 8 månadar i fjor var det å reisa på trening og kamp endå viktigare enn før.

– Fotballen blei som ein fristad for meg, ein plass der eg kunne vera meg sjølv og kopla ut sorg og andre tankar ei lita stund.

– Når eg er så heldig og får trena ein så fantastisk gutegjeng her på Os så gjev det meg òg inspirasjon til å hjelpa andre, folk som Tommy, som gjer ein så meiningsfull jobb med gutar, og no også jenter, frå så vanskelege kår.

Slo Os i 2011

Juniorlaget til Os klarte for to år sidan å skåra det første målet og halda 1-0 kampen ut mot sterke Karanba.

Les òg: Ai Karanba - for ein siger!

I fjor tapte både juniorlaget og gutelaget for stjernene frå det brasilianske Karanba-prosjektet.

– Med gutelaget klarte vi å ta leiinga 1-0, men Adam var ikkje lenge i Paradis, Karanba tok ein fortent 5-1-siger, innrømmer gutetrenaren til Os.

I år stiller Karanba berre med juniorlag i Norway Cup.

På same skule

Bjørn fortel at gutane frå Os budde på same skule som Karanba i fjor, og at han då fekk kontakt med Tommy Nilsen.

– Det var travelt for oss begge, særleg for Tommy, som mange ville ha ein prat med, så det blei ikkje tid til dei djupe samtalane om fotball eller om prosjektet hans.

– Men vi fekk oss nokre samtalar og har halde kontakten via epost og facebook og eg fortalte at eg ville prøva å støtta prosjektet hans.

Det var fotballar Nilsen var mest interessert i, og fotballar blei det!

– Leverandørar har sponsa med svært snille prisar og fleire bedrifter har støtta med 10-20 ballar kvar så no kan eg ta med meg 100 gode fotballar til Oslo og gje dei til gjengen frå Karanba i gåve. Det ser vi veldig fram til, seier Mjelva, ei dryg veke før starten på årets Norway Cup, den 40. i rekkja.

– Kanskje kan vi ein gong få Karanba-gjengen til den vakre bygda vår, Os, til ei lita treningssamling på Kuventræ, legg han til.