Gjev ikkje opp turveg

På plan- og bygningsutvalet torsdag handsama politikarane ei sak frå forsvaret der dei ber om å få starta områderregulering av Ulven skyte- og øvingsfelt.

– Eg tykkjer at vi i denne saka kan legga inn turveg rundt Ulvenvatnet.

– Vi har kjempa i årevis for å få det til, og møtt kvist på kvist i forsvaret heile vegen.

– Difor tykkjer eg at vi allereie i oppstartsmeldinga skal seie at turvegen må leggjast inn, opna Gustav Bahus (Frp).

Brei støtte

Både Harald Nordvik (TvS) og Harald Døsen (Ap) gav si fulle støtte til Bahus sitt utspel.

– Ap støttar Gustav. Vi har det jo programfesta òg at vi vil ha den gangvegen.

– Det er no det rettet tidspunktet å få det til. 12-7-banen over vatnet er så vidt eg veit flytta, så du har mi fulle støtte, supplerte Nordvik.

Gang- og sykkelveg

I tillegg til turvegen rundt vatnet vil politikarane ha inn at ein forutset at forsvaret opparbeidar gang- og sykkelveg langs Lyseklostervegen så langt forsvaret sin eigedom strekker seg.

– Då er det ikkje meir enn nokre hundre meter bort til vegen til Lyseparken.

– I tillegg tykkjer eg at vi ber om ei synfaring og ein 3D-presentasjon ved neste handsaming, la Bahus til.

Forsvaret fekk oppstartsløyve med med tre samrøystes tilleggspunkt.