Jostein Eck (t.v.) og Peter Moesgård får fullt telt laurdag. Fredag skal dei lokka gjestar frå Oseana med marsj frå Mobergsneset. (Foto: Kjetil Vasby Bruarøy)

God interesse for oktoberfest i sentrum

Laurdagen er nærmast utselt, fredag skal arrangørane «henta» Kristian Valen-publikum med fakkeltog.

Av: Kjetil Vasby Bruarøy

I starten på oktober fortalte Catten, Os sentrumsforening, Havnechefen og initiativtakar, den danske kokken Peter Moesgård, om plan om å laga ein stor oktoberfest i telt utanfor Catten Nightclub.

– Responsen var veldig god, spesielt omlaurdagen. No har vi berre rundt 30 av250 billettar igjen, seier Jostein Eck frå Baronessen og Catten.

– Bandet er òg på plass, vi er heldige og får Midtun Pavillion orkester til å spela for oss.

Midtun Pavillion orkester er eit 31 år gamalt, attraktivt band med 16 musikarar. Dei har spesialisert seg på tyrolermusikk og andre låtar som innbyr til allsong, og dei har spelt i Tyskland, Austerrike,Tsjekkia og Spania.

I Praha deltok dei på ein polkafestival og vann publikumsprisen! 

Etter ompamusikk skal dei lokale heltane i Kivi på scenen, også dette i teltet.

Hentar gjestar med fakkeltog 

I utgangspunktet var det lagt opp til to like kveldar, i både musikk og meny. Heilsteikt gris, sauerkraut og kåring av beste kostyme.

– Einaste forskjell blir at Midtun Pavillion orkester berre speler laurdag, fredag kjem ein trubadur før Kivi skal på scenen.

– Det er òg nokre færre bestillingar fredag, så det blir mogleg å kjøpa fest og mat separat, og maten blir i restauranten Havnechefen, ikkje i telt.

Jostein og Peter har dessutan plan om eit anna grep for å laga liv i teltet også fredag.

– I samarbeid med Oseana får alle som har vore på Kristian Valen-show,dei første av dei nærmare 500 som har kjøpt billett, oktoberfest til redusert pris. Vi skal ut til Oseana når showet er over, og tar med både faklar og musikk for å laga eit livleg tog frå Mobergsneset til teltet på Øyro.

Talentkonkurranse på dagtid

Som del av oktoberfesten blir det eit program på dagtid laurdag.

Patricia Langeland, Eirik Søfteland, Mats Cato Moldskred og Martine Frotveit Johnsen er jury i talentkonkurranse i teltet.

– Til no har sju ungar og ungdomar meldt seg på, og vi tar framleis imot fleire, seier Jeanett B. Kallekleiv i Os Sentrumsforening.

Framføringa deira kan du sjå frå klokka 11 laurdag formiddag.

Fleire saker