God kammerstart
Sundag blir det Grieg i Griegsamlinga når MusicaNord set opp den fjerde konserten i sommar. - Det har starta bra, seier arrangøren.
Oseana har satsa tungt i sommar på å trekke til seg publikum også i den litt rolegare delen av sesongen. Nyvinningane KammerScena og UteScena skal bidra til dette.
Torsdag blir utescene teken i bruk på alvor når Viggo Sandvik og Gøran Fristorp startar noregsturneen på Os.
Sundag blir det sesongens fjerde kammerkonsert i Griegsamlinga i regi av MusicaNord.
- Vi er rimeleg nøgd med besøket så langt, fortel informasjonsansvarleg Kristin Svarstad.
Er i ein oppstart
Sålangt har dei tre konsertane trekt brukbart med tilskodarar.
- Vi var jo litt spente på førehand om det ville koma folk, og det har det.
- Sjølvsagt kunne vi ønska oss fleire, men det er første sesongen og osingane treng gjerne litt tid til å venna seg til tilbodet.
- Difor håpar vi at vi kan nytta denne sommaren til å etablera tilbodet og at vi kan ta det vidare neste sommar, seier Svarstad.
Nokre som har satt pris på tilbodet er dei to hotella i bygda.
- Eg har inntrykk av at dei sett pris på å kunne tilby desse konsertane til gjestane sine.
Grieg-satelitt
Sundagens konsert er med MusicaNord sin kunstneriske leiar, fiolinist Michael Süssmann og Tor Erik Seim Pettersen på piano.
- Dei kjem til å framføra eit knippe meisterverk, mellomanna den ungdommeleg sonaten i F-dur av Grieg.
I tillegg står Johan Sverdrup sin udødlege romanse i G-dur og Fritz Kreislers elegante og virtouse preludium og Allegro på programmet.
- Avslutninga kjem det til å svinga av når dei spelar Sergej Prokofiev sin 2. sonate.
- Det er eit høgst pikant verk som grensar til både jazz og rock, forklarar Svarstad.
Konserten i Oseana er ein satelitt-konsert av sommarens "Grieg in Bergen".
Markerar datoen
22. juli står som ein merkedag i norsk historie. Konserten vil bli innleia med ei lita markering ved at dei to artistane speler Ole Bull sin I Ensomme Stunde.
Også i Os kyrkja vil datoen bli markert i samband med gudstenesta klokka 11 ved at tolv år gamle Sofie Kolve Haukås speler to stykker på trompet: Share my yoke (Del mi byrde) og Vitae Lux (Livets lys).