Olav Skorpen, Jens Erik Aasmundseth og Eirik Søfteland varma opp til torgfesten med familiekonsert laurdag formiddag (foto: Andris Hamre)

God opptakt til Torgfesten

Undercover varma opp til Torgfest på Øyro med familiekonsert. Her finn du det du treng vita før konserten laurdag kveld.

Av: Andris Hamre

Etter at Søre Neset Ungdomslag hadde kuppa familiekonserten med flashmob, var den endeleg tid for Olav Skorpen, Jens Erik Aasmundseth og Eirik Søfteland til å innta scenen. Dei tre karane som til vanleg speler saman i Undercover opna med «Månemannen» før det blei «Grevling i taket».

– No er vi i gang og klare til i kveld, fortalde William Lindborg, medarrangør frå Os sentrumsforening.

– Det er eit par ting som det kan vera greitt for folk å vita. Inngangen til festivalområdet blir i år på hjørnet av Havnechefen mot torget.

– Det blir to skjenkeområder. Desse kan ein gå fritt mellom, men ein har ikkje lov til å ta med seg drikke frå det eine området til det andre. Havnechefen har førebudd street food som dei kjem til å selgje på begge områda, så folk treng altså ikkje å gå inn på havnechefen for å få seg ein matbit.

– Vi har også leigd inn godt med toaletter i tillegg til dei som er på Havnechefen og på Catten, seier Lindborg.

Programmet

Dørene til torgfesten opner klokka 17, før første band går på klokka 18.

– Det er all grunn til å vera tidleg ute. Vi har seld rundt 300 billettar på førehand, så her kjem det garantert til å bli liv. Billetter kan ein kjøpe på nettet eller i døra når ein kjem, avsluttar Lindborg.

Desse speler på torgfesten:

• Vivillain
• ORBO
• The Untouchabl(u)es
• Gina Aspenes og Undercover

Fleire saker