Godt rusta for framtida

Bildeserie:

1 av 4

I omlag tre veker har Os Asvo vore i hus i dei nye lokala sine i Industrivegen. Onsdag ville nysgjerrige politikarar i tenesteutvalet på vitjing for å sjå.

– VI har måtte byggje eit hus som gjer det mogleg for oss å snu produksjonen frå ein dag til neste. Difor har vi lagt opp masse strøm og luft, men òg alt av utstyret flyttbart. Vi har ikkje lange produksjonsliner som vi hadde nede i næringsparken, forklarte Nygaard då han tok politikarane med rundt i den 1700 kvadratmeter store produksjonshallen.

Sjå korleis dei hadde det i gamle lokala i Midtsiden si videoreportasje «På innsio: Os Asvo»

Maler kjøken på 8 minutt

Ein av nyinvesteringane er ein topp moderne lakkboks.

– Ein av dei tinga vi gjer ein del av for privatpersonar er å rehabilitere og lakka opp kjøkkenfrontar. Med den nye lakkboksen kan vi male eit heilt kjøken på åtte minutt, reklamerte Nygaard, som blei retta av guttane i lakkboksen. Det tok no 10 minutt å tørka målinga, men at dei var nøgd med investeringa og at boksen fungerer bra var dei samde i.

Må vera fleksible

Gisle Hesjedal (Ap) lurte på korleis dei hadde klart å erstatta den største kunden sin, Lyssand Vindauge, då dei flytta sin produksjon til Sverige.

– Vi har måtte endra veldig og det har vore ei tung bør å ta inn att Lyssand som var 70% av omsetninga vår. Vi har rett og slett måtte gå ut i marknaden og selje oss. No mista vi nettopp ein ny stor kunde då Hole Glass gjekk konkurs, men vi omset for like mykje no, som vi gjorde før.

– Den store forskjellen er at medan vi før hadde få og store kunder, har vi i dag over 200 einskildkunder. Det er også ei utfordring fordi det blir mindre forutsigbart for arbeidstakarane, noko som er viktig for den delen av arbeidsstokken som vi har på Varig tilrettelagt arbeidstrening.

Ordre torsdag, leveranse fredag

Eit døme på den endra kvardagen er at dei stadig må vera meir fleksible.

– Det er noko av det som gjer at vi klarar å halde omsetninga oppe. Kundane våre veit at dei kan komma med ein ordre på spesialbygde fraktepallar torsdag og at dei kan vera på veg ut her fredag ettermiddag. Vi har må vera fleksible og snu oss kjapt, forklarte Nygaard.

– Er kundene bevisste på eit samfunnsansvar når dei nyttar dykk, eller er det berre økonomi som tel?

– 9 av 10 verksemder tenkjer business, så vi må levera gode produkt og vera konkurransedyktige både på pris og leveringstid.

Kan levera til skular og barnehagar

Ein av dei største kundene no er klatreparkane «Høyt og Lavt».

– Men de skal ikkje levera til Lyngheim, kommenterte Siren Tømmerbakke (Sp).

– Nei, men vi leverer til den parken som skal koma på Kyrkjeflaten. Vi kan òg levere leikeapparat og klatreelement til skulane. Det er berre å bruka oss som leverandør av varer og tenester til kommunen, oppmoda Nygaard.