midtsiden

Gratulerer, Jimmy!

Jimmy Øvredal fyller 70 år i dag. Rune Bruarøy gratulerer i eit lesarinnlegg fylt med gode minner frå Dalen.

Av: Kjetil Vasby Bruarøy

Til Osbygdas store son

Da e mange som er redd for å for å bli gammal, men du får like god kontakt med ein åttaåring som ein åttiåring, alder betyr lite eller ingenting.

Kjære Jimmy, da e mange som har deg å takka. For å sitera Winston Churchill, som sa om dei tapre RAF-flygarane som seinka tyskarane under den andre verdskrigen: «Aldri har så få gjort så mykje for så mange».

Då eg var i «slyngel-alderen» var eg mykje i Dalen, hos deg og snille Åslaug som eg er så glad i. Me gjekk lange turar i fjellheimen din, Bernt Røttingen, du og eg. Me merkte fuglar i lag og hadde fleire fine opplevingar i naturen. Saman med oppveksten min med mor og far heima i Øyane var dette med på å gje meg ein fin ballast i livet.

Du hadde ein far med kort lunta (litt hissig), som syntes at du brukte vel mykje tid saman med desse øyagutane midt i slåtten. Og du hadde ein onkel som sikkert hadde den lataste hesten i landet, men han hadde mykje tolmod. Det grovaste han kunne seia til hesten var, sjølv om han skulle kjøra inn tørrhøyet inn og regnet ausa ned: «… skunda deg no».

Du har alltid sett da stora i da små og du har alltid tatt dei svakaste i forsvar. Du skriv at du ikkje er bonde, fiskar eller jeger. Dei to første er du definitivt ikkje, men da sista e ein «bløff». Du e ein habil jeger og skyttar. Du har felt mange hjortar opp gjennom åra og, dersom eg ikkje hugsar feil, heng det ein blink i Skyttarhuset med 25 tiarar som du prikka inn. Då andre skulle kvila middag fekk eg låna salongrifla di. Då sykla eg til bossfyllinga i Lønningdal og skaut rotter store som kattar. Eg hugsar korleis dei rulla ned bossrenna og hamna i botn med eit dunk.

Ein ting eg må ta med er då me fekk ein røyskatt i slåmaskino. Den var ikkje eit vakkert syn, men du foreslo (dette er forelda no) at eg skulle gå ned til lensmannen og sjå om eg fekk skotpremie på den, slik ein får for minken. «Dei ser ikkje forskjell på mink, mår eller røyskatt», meinte du.
Og ganske rett. «Er det skotpremie på desse», spurte eg, og løfta dan skamferte røyskatten opp av sekken.« Ja», var svaret, «men få den vekk», sa dei. At innvollane hang og dingla var nok medverkande til den raske avgjerda, 20 kroner frå staten og 20 frå kommunen var mykje pengar for ein ungdom på den tida.

Eg hugsar òg då du kjøpte ein Renault (dei fleste lærarane kjørte Saab 2-takt eller Opel Kadett). Bilen hadde girstang som sto i 90 gradar vinkel, stanga var spesiell og du var ikkje akkurat ein Petter Solberg bak rattet. Me kolliderte med Magne Midtseter og bilen blei totalvrak. Åslaug hadde Anders mellom beina (det var ikkje snakk om bilbelte eller airbag på den tida), Bernt, Torunn og eg sat bak. Eg sat slik til at eg såg kva som kom til å skje, så eg kasta meg over godjento di så ikkje ho skulle stupa framover. Du hadde halde så hardt i rattet at det sto bøygd vassrett over dashbordet. Det gjekk bra med oss alle, men Bernt fekk hjerneskaking så mora hans trudde først at vi hadde smakt på nypevinen din. Heldigvis trudde ho på meg då eg sa at vi hadde vore i kollisjon.

Eg kunne ha skrive mykje om alle hytteturane du, eg og Bjarne Øvredal har hatt (snart tid for ein ny). Men me må framleis koma til eit kompromiss, du vil ha da varmt, men max 30° nede hos deg og max 45° på hemsen, der eg søv. Så skal eg ikkje landa på magen din fleire gongar når eg skal ut og skvetta litt om natto.

Som lokalpolitikar hadde du litt frå adle parti. Eg var ein periode i kommunestyret saman med deg og heidersmannen Paul Martin Sælen. Han sa ein gong til meg at me «rotnar på rot». Det har eg aldri gløymt, for det er jo sant.
Eg var imponert over di evne til å duppa av i periodar med mykje tåkeprat i møta, for så å bråvakna då du fekk ordet og vera så klår, kjapp og presis i kva du meinte.

Takk, Jimmy, for adle opplevingane og dei rike åra av livet du har gjeve meg, du er ein bauta! Og takk til omsorgsfulle, snille og tålmodige Åslaug, som du skal vera glad for at du har. I dag ville ei kone sagt «eg gidd ikkje meir». Ikkje fordi du ikkje er snill, men Åslaug har gjeve deg muligheten til å formidla kunnskap og til å dyrka interessene dine.

For å bruka dine ord: Lev vel og lukka til med dagen og 70-årsfeiringa på Stord! Vi får satsa på å feira 80-årsdagen med sjød´n her hos meg.

Helsing frå Rune Bruarøy

Vil du skriva ei helsing til Jimmy?
Logg inn som lesar og legg til kommentar i feltet under.

Fleire saker