Gratulerer med 10-årsdagen, Osbadet!
Bildeserie:
I dag er det 10 år sidan den offisielle opninga av Osbadet onsdag 20. september 2006.
Det vellykka byggeprosjektet blei sluttført med ein staseleg fest, som blant anna inkluderte oppvising i stup, song til Osbadet og konkurranse der Alexander Dale Oen og broren Robin svømte stafett mot eit lokalt lag på litt fleire svømmarar.
Sjå bilde frå byggeperioden og opninga i serien over.
10-årsdagen blir i dag markert med avduking av nye modular i barnebassenget før lunsj med inviterte gjestar.
I dag kan Osbadet sjå tilbake på blant anna desse besøkstala:
2007, første heile driftsår: 62.000
2008: 63.000
2009: 63.000
2010: 62.000
2011: 72.000 (BT-bading gjorde utslag her)
2012: 69.000
2013: 64.000
2014: 58.000 (svært varm og fin sommar)
2015: 53.000
– I år ligg vi framfor fjoråret. Før opning var det kalkulert med 40.000 til 60.000 badande, så tala er framleis fine, seier dagleg leiar Bård Alfstad.
– Utanom dette kjem skulebading, Os Svømmeklubb, Actic-medlemmar, kurs og all utleige. Til saman har vi over 100.000 badande gjestar i året, omsetnaden har dessutan vore stabil og aukande trass noko varierande besøk.
Banerekordane
Osbadet arrangerer kvart år osmeisterskap i svømming for skulane i kommunen. Der blir banerekordar noterte, her er dei gjeldande rekordane (alle er frå skulemeisterskapa):
25 meter, 10-åringar
Bryst, jenter: Anna Martine Mjånes 22,33 (2012)
Fri, jenter: Guro Drange Veglo 17,23 (2009)
Bryst, gutar: Johannes Meidel Eikeland 24,31 (2014)
Fri, gutar: Emil Harlem 15,34 (2016)
Stafett 4 x 25 meter: Os barneskule 1.32,06 (2012)
25 meter, 11-åringar
Bryst, jenter: Ariel Braathen 19,41 (2011)
Fri, jenter: Tracey Malene Holm 14,96 (2016)
Bryst, gutar: Tom Andree Moberg Johansen 22,29 (2009)
Fri, gutar: Johannes Meidel Eikeland 17,22 (2015)
Stafett, 4 x 25 meter: Os barneskule 1.27,94 (2013)
25 meter, 12-åringar
Bryst, jenter: Ariel Braathen 17,90 (2012)
Fri, jenter: Ariel Braathen 14,54 (2012)
Bryst, gutar: Tom Andree Moberg Johansen 19,24 (2010)
Fri, gutar: Tom Andree Moberg Johansen 14,37 (2010)
Stafett, 4 x 25 meter: Kuventræ barneskule 1.19,56 (2014)
Dale Oen sette rekord
Alexander Dale Oen (1985-2012) frå klubben Vestkantsvømmerne hadde sitt internasjonale gjennombrot i 2005, med sjuandeplass på 100 meter bryst i langbane-VM. Under kortbane-EM i desember 2005 sette han nordisk rekord på 100 m bryst med tida 59,05, og tok ein fjerdeplass på distansen. Oen tok og bronse i kortbane-VM 2006 i Shanghai.
Under opninga av Osbadet blei han og klubbvenninne Henriette Brekke oppfordra til å setja banerekord på 200 meter.
Henriette svømte inn på 2.12,,7, medan Alexander sette ny personleg rekord med tida 1.59,8.
- Startblokka var veldig god, og kantane på bassenget er slik at dei ikkje skvulpar så mykje tilbake, sa Alexander til Midtsiden.no etter rekorden.
Brystsymjaren innrømmer at det er ei stund sidan sist han svømte fri, men legg til at han var positivt overraska over den gode tida.
Svømmer langt når det er kampanje
Frå 2008 til i dag har Osbadet vore med på den riksdekkande Svøm langt-kampanjen forbundet køyrer gjennom vinteren, der deltakarane er med i trekning av lokale og rksdekkande premiar.
– Det første året hadde vi 185 deltakarar, etter dette hadde vi 150 deltakarar i seks år å rad, fortel nestleiar Torbjørg Brattabø.
Dei to siste åra har det vore rundt 120 deltakarar, men distansen deltakarane svømmer har auka frå 1,5 til 2 millionar meter til saman.
– Rundt 60 prosent av dei som melder seg på klarer distansen i løpet av perioden, frå januar til rundt påske. Vi har flest deltakarar frå 35 år og oppover på desse kampanjane, fortel Brattabø.