Grunneigar Reidar Rundsveen og ordførar Marie L. Bruarøy sto for den offisielle opninga av gapahuken i dag. (Foto: Kjetil Vasby Bruarøy)

Grunneigar og ordførar opna gapahuk

Bildeserie: Stort oppmøte på offisiell opning av gapahuken ved Knutabruo i dag.

image
image
image
image
image
image
image
image
image
Av: Kjetil Vasby Bruarøy

– 25. oktober 2015 var Knutabruo ferdig, i november i fjor var gapahuken ved elvo ferdig og då vi såg kor mykje den blei brukt så ville vi laga ein ny ein. Vi hadde jo litt ledig tid, seier Peder Fløysand.

Nokre hundre hadde møtt fram i sol og litt vind då den store, arkitektteikna gapahuken blei offisielt opna i dag.

• Les òg: Gapahuken er ferdig møblert

Eldsjela Peder Fløysand frå dugnadsgjengen «Brukameratane» heldt fram med å takka grunneigar Reidar Rundsveen, hovudsponsor Knut-Jarle Aspenes, kommune, gode støttespelarar og sponsorar før han gav ordet til ordførar Marie Lunde Bruarøy.

– Det er eit fantastisk initiativ og samarbeid, eg synest det er nesten utruleg at vi kan ha eit prosjekt som dette, der alle smiler og heile bygda er takksam, sa Marie før ho tok fram saksa.

Etter den offisielle seremonien var over, i samtale med Midtsiden, ville varaordførar Laila Reiertsen koma med ei presisering.

– Peder (Fløysand) er flink å takka andre, men hugs at han er nummer éin. Peder har stått i spissen for brua og for gapahuken, utan Peder hadde det ikkje skjedd noko som helst her inne ved elva.

Reiertsen fekk samtykkande støtteerklæring frå brukameratar i bakgrunnen.

– Ei glede å gje løyve

Grunneigar Reidar Rundsveen har gjeve grlnt lys til både brufeste og gapahuk.

– Når det er ein gjeng som dette, og så gode prosjekt, er det berre ei glede å seia ja.

Brukameratane består av: Peder Fløysand, Knut-Jarle Aspenes, Harald Døsen, Bernt «Sogna-Bernt» Norevik, Øyvind Tøsdal og Lars Skorpen. Gapahuken er teikna av arkitektane Jan Haaland og Rigmor Sletnes.

– Prosjekta og byggverka er gode, alt blir gjort skikkeleg og arbeidet blir utført med timesvis med dugnad. Min del av jobben har vore den enklaste, eg trengte berre seia ja.

Turlaget overtar drifta

Eit vilkår for at kommunen skulle seia ja til tiltaket i naturen, var at ein større organisasjon skulle ta på seg ansvaret med vedlikehaldet.

Leiar for Os Turlag, Arvid Øvreeide, var sjølv på plass under opninga i dag.

– Vi stussa ikkje då vi blei spurd om dette. Arbeidet blir ikkje særleg krevjande, litt tilsyn og litt beis frå år til år.

Både Peder, Marie og Arvid kjem med bøn til brukarane:

– Det står bålpanner her, bruk dei. Ta med deg bosset når du går, og hjelp kvarandre å ta vare på gapahuken og møblane. Om de bruker eingongsgrill, ikkje set den inne på bordet, og ta den med deg igjen når du går, det er ikkje bosspann på staden.

– Vi har eit godt arbeidslag, «trivselsgruppa», som vi kallar den. Kvar torsdag er fleire av dei 30 i gruppa i sving med ulike tiltak.

– Det er òg ein ny gapahuk på gang i Lysefjorden, i nordenden av Langavatnet. Avtale med grunneigar er på plass og arkitektane Jan Haaland og Rigmor Sletnes har sagt at dei vil teikna denne òg. Vi har til og med fått ein kano av ein innbyggar allereie, og vil søkja om midlar til å få fleire.

– Slike tiltak som dette er med på å gjera at det er endå kjekkare å gå tur i Os, seier Øvreeide.

 

Fleire saker