Hadde ikkje éin gjest i mai eller juni

Inger Botnevik, som sidan 2009 har drive campingplass på familien sin gard gjennom somrane, byrja å lura då det ikkje kom gjestar til garden.

– Vi hadde ingen overnattingar verken i mai eller i juni. Eg måtte inn på ulike turistsider og sjå om det var noko på nettet som gjorde at folk styrte unna oss, fortel Inger.

Det ho fann var anbefalingar frå sykkelturistar om ikkje å sykla nedom Os sentrum. Årsaka skal vera høgdeforskjell, syklistane vil ikkje sykla opp frå sentrum for å trø vidare mot Halhjem eller Bergen.

Kuven Farm Camping ligg mellom sentrum og Kuventræ, og fekk med dette ingen syklistar forbi grinda si.

– Utanlandske syklistar har vore ei relativt stor, og veldig hyggeleg kundegruppe. Men det er heldigvis ikkje alle som lyttar til desse råda, eller som følgjer anbefalt rute om Ulven og Skeie.

Har tatt seg opp

Sesongstart blei i juli for Os' einaste campingplass, og dei siste vekene har vore gode, fortel Inger.

– Vi har hatt gjestar frå både Noreg, Nederland og Russland. I natt har vi hatt tre frå Polen her, og ein norsk familie.

– Eg synest det er kjekt både å snakka med utlendingane og å oppleva at norske småbarnsfamiliar som har vore her før kjem tilbake. Dei utanlandske er spennande å prata med og dei norske med born er veldig interesserte i dyra våre.

Første booking til Osfest

Botnevik fortel òg om nokre få bookingar fram i tid.

– Den eine hytta er bestilt for nokre veker samanhengande i haust, av nokon som skal jobba i Os ein periode, og så har vi fått bestilling på ein plass til campingvogn under Osfest.

Osfest går av stabelen 10. og 11. august.

– Merker du konkurranse frå bubilparkeringa som Os kommune har bygd på Steinneset?

– Ja, det har eg nok. Før hadde vi nokre bubilar innom i løpet av sesongen, i år har vi ikkje hatt éin. Det går an å forstå, det er fint nede ved sjøen.

– Men dei som kjem med campingvogn får vel ikkje stå der nede, så dei køyrer opp her.

Nye konkurrentar

– Kva med nye overnattingstenester, som Airbnb?

– Det har nok gjeve oss litt konkurranse, men ein nabo som leiger ut via Airbnb fortel at det har vore ein roleg sommar hos han òg.

Podtellet (minihotell) som blei levert ved Os hamn laurdag har førebels ikkje hatt gjestar.

– Ingen her overnatta her dessse første dagane, men vi har fått nokre bookingar, både til Osfest og i september, fortel Hans Parnefält i Os Travel.