Hallingkast i Wiesbaden

Bildeserie:

1 av 4

CISV (Children´s International Summer Villages) er ein fredsutdannande organisasjon, religiøst og politisk uavhengig, som jobbar med ungar frå 11 år og opp. Ved å samla ungar frå ulike land til tverrkulturelle møter i leir håpar organisasjonen på å bidra til auka forståing, kunnskap og toleranse mellom kulturar og nasjonar.

− Dette blir vår tredje gut som reiser på leir med CISV. Dei to andre har kome heim med venar frå land som Mexico og Belgia, som dei framleis har kontakt med. No er det William sin tur, seier mamma Ann Christin Skoglund.

Utan kontakt med heimen
Ann Christin blei tipsa av ein nabo om CISV sine leirar. Etter tur har gutane søkt på å koma med, og familien har berre positive erfaringar med å senda ungane vekk frå heimen i fire veker.

− Deltakarane har ikkje lov til å ha med verken iPod, PC eller mobiltelefon. Dei skal vera saman, og dei skal ikkje ha kontakt med heimen. Dette er kanskje tøffast for oss heime, men dei siste åra har arrangørane heldigvis lagt ut bilde på nett. No kan vi i det minste få med oss litt av kva dei held på med, og kanskje finna våre håpefulle på eit av bilda som blir lagt ut.

På kvar leir er det 48 ungar, 12 nasjonar stiller med fire deltakarar kvar. Loddtrekking avgjer kven som får reisa og ungane veit ikkje på førehand kva land dei hamnar i.

Sjokolade og brunost
Denne sommaren reiser Jannicke Råen, Marie Aga, Nils Andris Hamre og William Skoglund frå Os til Tyskland på leir. Felles for dei fire er at dei ikkje trur at dei kjem til å sakna heimen, og at dei først og fremst ser fram til å få nye venar frå andre land. På leiren skal deltakarane frå dei 12 nasjonane vise litt om landet dei kjem frå.

− Vi har blitt sponsa med ein kartong Vestlandslefsa frå Lefsebakeriet i Os og varer frå Eurospar, som seigemenn, sjokolade, flatbrød og brunost, fortel dei fire.

Deltakarane har også fått høve til å bli kjent med kvarandre før avreise. På ”leikemøte” har ungane, jentene frå Kuventræ skule, gutane frå Os og Nore Øyane, øvd på songar som skal syngast på leiren og planlagt turen og kva dei skal ha med seg.

Bukkene bruse og Alexander Rybak
Dei norske 11-åringane skal ikkje berre dela ut mat og snop når dei er i Tyskland – dei skal også ha framsyning av bukkene bruse, på engelsk, og dansa halling.

− Gjett kva låt dei skal dansa etter, seier foreldra som stilte opp då Midtsiden fotograferte deltakarane, og fekk dei til å demonstrera hallingkast i parken på Moldegaard.

− Men vi valde den ut før Rybak vann Grand Prix, presiserar dei.

Gjengen frå Os skal på leir med andre 11-åringar frå 11 andre land, blant anna India, Nederland, Canada og Portugal. I tillegg til ungane stiller kvar nasjon med ein leiar. Frå Os er det Camilla Borgen som skal ha denne rolla.

I sommar sender CISV Os også 14-15-åringar på camp, dei skal til USA. Før jul skal ein annan delegasjon frå Os på CISV-leir. Denne gjengen reiser til Brasil.

Om CISV
• CISV blei grunnlagt i 1951, og Noreg har vore med frå starten.
• I Norge heter organisasjonen CISV Norge Internasjonale Barneleire.
• Organisasjonen er etablert i over 50 land, i alle verdsdelar.
• CISV sitt slagord er «Barna er nøkkelen til fred»
• Sidan starten har meir enn 150.000 personar frå nesten 100 ulike land deltatt i CISV sine internasjonale aktivitetar.

Du kan lesa meir om organisasjonen på www.cisv.no