Hamna i grøfta "av seg sjølv"

Tysdag ettermiddag åtvara Os kommune mot glatte vegar, onsdag morgon hamna ein bossbil i grøfta på Haugland.

– Bilen sto fint då eg gjekk ut for å henta bosspanna, men så byrja den å gli, fortel føraren.

Bilen glei sidelengs av vegen og hamna i grøfta på Reset på haugland. No er det så vidt passasje til forbipasserande til bustadane innanfor.

Dobbelt med arbeid - dobbelt med tid

– På grunn av fridagane som har vore så har vi dobbel tømming i dag. Då passar det dårleg med sånne kjøreforhold som dette.

Bilen har stått fleire timar i grøfta.

– Det er klink is på nesten alle sidevegar, eg har vore vitne til fleire nesten-ulykker i dag, seier sjåføren frå Bir.

Kvir seg til Ingjelsbrekko

Då Midtsiden var på staden hadde ein reserverbil kome, så føraren kan halda fram med ruta si. Viking er på veg for å taua den andre bilen opp av grøfta igjen.

– No kvir eg meg til Ingjelsbrekko, den er både bratt og svingete, seier føraren.