Hamna i myra
Eit ektepar kjørte utfor Halhjemsvegen, ein mann blei tatt med promille på Søfteland og ein gut blei tatt i Idrettsvegen med blålys på privatbil.
I 14-tida laurdag hamna eit eldre ektepar i ei myr på Halhjemsvegen.
Då Midtsiden kom på staden sat kona framleis i passasjersetet.
– Vi er like heil, stadfesta dei to.
Ekteparet frå Halhjem var på veg heim frå handletur på Os då uhellet skjedde. Redningsbil er kontakta. Politiet hadde ikkje høyrt om utforkjøringa då Midtsiden slo på tråden.
Tatt med promille
Laurdag morgon hadde politiet ein promillekontroll i Storestraumen/Hjellemarka.
– Ein av bilistane, ein mann i 40-åra, er mistenkt for promillekjøring, opplyser politibetjent Kjartan Snorrasson.
Mannen blei tatt med til blodprøvetaking. Politiet har tatt beslag i førarkortet.
– Det et nok snakk om dagen-derpå-promille, trur politiet.
Med blålys i grillen
Ein politimann som ikkje var i teneste oppdaga ein privatbil med blålys i grillen.
– Vi har vore i kontakt med bileigar, ein ung mann i 20-åra.
– Han vil bli meldt, seier Snorrasson.
Og då blir han ikkje berre meldt for feil bruk av lys?
– Nei. Her er det snakk om å utgje seg for å vera noko du ikkje er, ei litt meir alvorleg sak.