Hamna på taket på Lepsøy

Måndag i 20.30-tida kom melding om bil på taket på Lepsøyvegen.

Brannvesenet, ambulanse og politi rykte ut til ulykka, som var utan personskade.

– Vi var på veg til fotballtrening, fortel passasjeren til Midtsiden.

Bilen hadde retning frå Øyane då dei to møtte ein bil i ein krapp sving.

Volvoen dei to sat i bremsa, men dei klarte ikkje å unngå å hamna opp på ein murkant og velta ut på ein liten parkeringsplass ved eit naust.

– Det ser ikkje ut som om dei har hatt stor fart. Heldigvis gjekk det fint med begge to, seier Terje Håvardstun, redningsleiar frå Os brannvesen.

Politiet var på staden, men opprettar ikkje sak på utforkjøringa.

– Det er ikkje mistanke om høg fart og vi ser på dette som eit uhell, seier politioverbetjent Terje Sperrevik.