– Han er drit god

Bildeserie:

1 av 2

Irriterte du deg litt over orddelingsfeila i tittel og ingress? André Ulveseter, som har standupshow på Catten fredag, er profesjonell innan det å irriterera seg over tilsvarande skrive feil (vi skal gje oss no).

Med Facebook-sida «Bilder i kampen mot særskrivingsfeil» har han over 180.000 følgjarar. Der deler han eigenproduserte bilde og illustrasjonar som viser korleis ord skiftar meining om du er for ivrig med spacebaren (ja, den lange på tastaturet ditt, nærmast magen).

– André er passert 40 og er nok den eldste vi har hatt på standup på Catten, seier komikarkollega og arrangør, osingen Jon Hægland.

Hægland skal sjølv varma opp publikum for hovudgjesten.

Når Ulveseter ikkje styrer standupscenen i Ålesund, der han har busett seg, reiser han rundt og held foredrag for blant anna lærarar. Ulveseter har òg gjeve ut boka «Ett ord – bilder i kampen mot særskrivingsfeil».

Erfaren bergensar

Showet på fredag er første standup på Catten sidan den tradisjonelle comedy fight club påskeaftan (sjå video).

– Det har ikkje blitt tid til så mykje meir, men då Ulveseter no ville koma med soloshowet sitt til intimscenen vår på Catten så takka eg ja. Han treff nok endå breiare i alder enn tidlegare artistar vi har hatt.

– Eg har sett André i Ålesund og som headliner på Ricks i sommar. Han er erfaren og dyktig, langt meir morosam enn du skulle tru, når du veit at han både er forfattar og held foredrag.

«Dette er den beste stand-up jeg har hørt – EVER! Ingen pinlige pauser, ingen dårlige vitser, bare et forrykende show som varte og rakk 10 min på overtid!» er blant tilbakemeldingane han har fått frå kundar.

Årets skjemtegauk

Ulveseter er frå Bergen og har drive med standup sidan 1997. I 2014 kom han med soloshowet Plenum, som han altså no tar med til Os.

Showet tar for seg frykt og fobiar, med døden godt representert. Kvifor er nordmenn meir redde for å snakka i plenum enn for å dø? Kva bør du vera redd? Og kva er komikeren sjølv redd for?

André vann publikumsprisen under fjorårets Skjemtegaukfestival i Ulsteinvik, og kan med rette kalla seg «Årets Skjemtegauk 2015».

Vil du ha ein forsmak frå tidlegare standup (2009)? Sjå Ulveseter snakka om «Da damene dro» (YouTube).