Os lensmannskontor. (Ill. foto: Kjetil Vasby Bruarøy)

– Han sa han var frå Microsoft. «Det er du slettes ikkje!» svarte eg

Mann i 70-åra let seg ikkje lura. No åtvarar han mot ny runde med svindelforsøk.

Av: Kjetil Vasby Bruarøy

I 2012 blei var det tett med tilfelle av folk frå Os og andre stadar i Hordaland som blei oppringt av svindlarar som hevda dei var frå Microsoft.

Minst to frå Os blei lurt.

Les òg:
Blei rundlurt av falsk Microsoft-tilsett
Sperra kort og leverte PC på rens

Også i 2013 og 2016 var det fleire som fortalte politiet om oppringingar frå folk som utgav seg for å vera frå Microsoft.

Metoden, om dei nådde målet, var den same; Få fjerntilgang til andre sin PC og få tilgang til både nettbank og misbruka identiteten deira til anna form for økonomisk svindel.

To oppringingar på éi veke

Fredag blei Midtsiden kontakta av ein mann i 70-åra frå Midtskogvegen. Då hadde han, for andre gong på ei veke, blitt oppringt frå nokon som utga seg for å vera frå Microsoft. Microsoft Norge har tidlegare sagt at dei aldri ringer folk «på denne måten».

– Det heile høyrdes truverig ut, med bakgrunnsstøy som om det var eit profesjonelt kontormiljø, og høfleg og sakleg tone. Eg forstår at folk let seg lura, seier han.

Men han har lest og høyrd om desse «medhjelparane» frå før, og var rask med å avvisa.

– Han sa han var frå Microsoft. «Det er du slettes ikkje!» sa eg. Han prøvde seg med ei setning til, men då eg sa at eg visste at dette er svindelforsøk, så la han på.

Både utanlandske og norske nummer

Midtsiden kjenner til yttarlegare eitt tilfelle i Os dei siste to vekene, begge blei oppring frå nummer som starta på 44, altså landkode for England.

Os lensmannskontor er takksam for at folk opplyser om slike forsøk for å åtvara andre.

– Så vidt eg kjenner til har vi ikkje fått inn tilsvarande meldingar den siste tida, men eg veit om fleire tilfelle i Hordaland det siste året, seier politioverbetjent Christine Grindstein.

I fjor runda ho av eitt år på «Felles straffesak inntak», der ho fekk oversikt over alle innkomande saker i distriktet.

– Det viser seg at svindlarane ringer både frå utanlandske og norske nummer. Nokre av dei er òg norsktalande.

– Dessverre er det vanskeleg å nå ut til alle med åtvaring og informasjon, men når desse metodane framleis er aktuelle, er det positivt at det kjem omtale.

Fleire saker