– Han sto heilt opp i ansiktet mitt og lo av politiet

– Det er ikkje snakk om naskeri, men varer for langt over 20.000 kroner. I går kunne politiet få dei servert på sølvfat, seier Lars Petter Grønvigh, butikksjef hos MX Sport Os.

Les òg: Menn kneip jenter i rumpa

– Tjuveri er eit stort og veksande problem for oss på Amfisenteret, og kan bety pluss eller minus i rekneskapen på slutten av året for fleire butikkar.

Les òg: Unge jenter stal frå fleire butikkar (sak frå februar)

– Det er snakk om store verdiar og eg veit snart ikkje kva verktøy vi skal bruka for å beskytta oss mot dette.

Tatt med tjuvgods - lo av politiet

For tre veker sidan blei ein mann observert i det han sprang ut av MX Sport ikledd ein Norrøna-jakke til 5500 kroner han ikkje hadde betalt for. Tysdag blei nytt tjuveri oppdaga, og kameraopptak frå måndag viser at det er same mann.

Onsdag var han tilbake på senteret.

– Vektaren, som har fått sett dei tidlegare opptaka, kjente tjuven igjen og tipsa ein av våre tilsette. Saman følgte dei to etter mannen opp mot Kiwi Gudriflaten mens eg kjørte heimefrå for å møta dei.

Dette var i 19.40-tida.

Mistenkte, ein utanlandsk mann i 20-30-åra, var roleg, men ifølgje Grønvigh oppførte han seg veldig provoserande.

– Han sto 10 cm frå ansiktet mitt og sa at ullgenseren var varm. Då eg sa at politiet var på veg så berre lo han. Han hadde overnatta hos politiet før, sa han.

Møtte «MX-kameratar» og jenter

Grønvigh følgte etter den mistenkte, ein mann med austeuropeisk utsjånad og aksent, til busshaldeplassen ved Meny i Industrivegen. Der møtte han han to kameratar.

– Kameratane var kledd frå topp til tå i same plagg som har forsvunne frå butikken vår dei siste vekene.

Det var også nokre unge jenter på busshaldeplassen. Desse ringte politiet klokka 20.50, då dei hadde tatt bussen til Nesttun, at tre utanlandske menn hadde knipe dei i rumpa og kyssa dei på halsen rundt klokka 20.10.

– Ein av dei tre gjekk opp på Meny. Eg ringte og varsla at det var ein tjuv på veg, men dei rakk ikkje stoppa han før han var ute av butikken igjen. Han kom ned på busshaldeplassen med lommene fulle av cider.

– Kvar var politiet?

MX Sport-sjefen ringte politiet 4-5 gongar i går og fortalte om situasjonen.

Midtsiden har retta: Vi skreiv først at innringar hadde fått beskjed frå politiet at det ville ta fire timar før dei kunne koma. Dette stemmer ikkje, opplyser Hadler-Olsen. Operasjonssentralen skal ha opplyst til vektar at politiet i Os var opptatt med to patruljar. Dette skal ha blitt oppfatta og vidareformidla som at det fint kunne gå fire timar.

– Eg følgte etter dei, også då dei tok buss mot Bergen, men gav opp etter 2,5 timar. Politiet ba meg halda på dei, så skulle dei ringa meg opp igjen. Ingen har ringt. I teorien kunne eg ha sete og halde på dei enno.

– Her har vi kameraopptak og tjuvgods for over 20.000 kroner, dei kunne fått det servert på sølvfat. Viss dei også har vore ufin mot to unge jenter så kunne dei oppklart denne saka med på kjøpet.

Os-politiet fekk ikkje backup

Politioverbetjent Audun Hadler-Olsen ved Os lensmannskontor seier dei hadde to patruljar i sving på kvelden i går, men at dei var opptatt i ein større aksjon.

– Eg kan førebels ikkje fortelja om oppdraget, men det var krevjande og av ein sånn karakter at vi ikkje kunne gå frå staden. Fleire personar blei tatt i aksjonen.

– Vi synest det er veldig fortvilande at vi ikkje fekk rykt ut på dette, noko vi normalt sett ville prioritert.

Dermed var det opp til operasjonsleiar i Bergen å senda mannskap. Midtsiden har ikkje lykkast å få nokon i Bergen til å kommentera kapasiteten og ressursbruken i distriktet onsdag kveld.

– Mens eg følgte bussen mot Bergen så møtte eg ein patrulje. Då ringte eg igjen og sa at det no, då vi nærma oss Bergen, burde vera i alle fall éin patrulje som kunne møta meg og bussen, var det framleis ikkje hjelp å få. Då snudde eg og kjørte heim, fortel Lars Petter Grønvigh.

– Eg forstår at det finnest viktigare saker enn tjuveri, men at ingen i heile bergensområdet kunne prioritera denne saka synest eg er rart og trist.

Rustar seg mot nye tjuveri

Grønvigh seier han no vil førebu sine tilsette på auka fokus på tjuveri, og på reaksjonar når nokon blir tatt.

– Vi har hengt opp bilde av mistenkte og vi har sett opp ein plakat, på engelsk, som fortel at vi vil stoppa tjuveri med alle midlar.

– Så får tjuvane og politiet tolka det som dei vil.