Handbak-kvalifisering på Amfisenteret
Bildeserie:
I 11-tida i dag starta den lettaste vektklassen i den norske kvalifiseringa til World Armwrestling League (WAL) i England.
Os Håndbakklubb er vertsskap og stiller sjølv med 10 deltakarar og éin dommar.
– Vi har deltakarar frå blant anna Trondheim og Austlandet, fortel Frode Veim Haugland, som sjølv har lang internasjonal erfaring, og har gjort det svært skarpt i europeiske rundar i WAL.
• Les òg: Til Las Vegas som beste europear
– Seks deltakarar i kvar klasse kan sendast vidare til WAL i England, som truleg blir arrangert i Manchester eller London.
Bryter heile dagen
Handbakklubben har rigga opp brytebord på scene i 1. etasje på Amfisenteret og brytinga kjem til å halda fram omtrent til senteret stenger.
– Vi får sjå kor raskt det går, men eg reknar med at finalane byrjar i 16-17-tida.
Dan-Jarle Køhler Raustein stiller som dommar, då WAL ikkje har vektklassar som matchar han.
Os stiller elles med desse utøvarane: Andrea Drange, Lisbeth Fagerheim, Arne Thuen, Are Strønen, Tore Matre, Frode Veim Haugland, Ronny Risøen, Erlend Hjertholm, Eivind Bøe Johannessen og Per-Christian Helland Rundhovde.
– Dette er mi andre tevling. Vi er berre tre jenter, og dei to andre er i vektklassen over meg, så eg reknar ikkje med å vinna så mykje i dag, seier Lisbeth Fagerheim.
– Men sidan vi er få deltakarar er eg nok uansett kvalifisert til WAL England, og der vil eg møta brytarar i min eigen vektklasse.