Hanne's Konditori & Musikkbar opna i dag

Bildeserie:

1 av 7

I februar fortalde Hanne Hansen og Bjørn «Bosse» Sigurjonsson frå Strøno at dei opnar konditori og musikkbar i Brugata i Os sentrum i slutten av april.

Tidlegare i april blei det òg klart at dei bygger terrasse for å få uteservering - på utsida av fortauet langs kvartalet.

Etter ein hektisk innspurt, med jobbing frå klokka 4 om morgonen til 23-tida om kvelden kan Hanne og Bosse no sjå fram til å ... opna før klokka 7 om morgonen.

– Kan skjønna at folk skal få frukost. Dei som vil kan òg svinga innom og henta med seg ein nistepakken, om dei ikkje rakk å laga noko sjølv, seier Bjørn på vegne av Hanne sitt nybygde kjøkken og konditori.

Frå morgon til kveld

Hanne har jobba som konditor i over 20 år og baker alle varer til kafeen, ved sidan av varene ho tar imot bestilling på, og dei som blir selt over disk.

– Eg er spent på kva som blir bestseljaren, om det er kaffimat, påsmurd eller brød, seier Hanne.

Bakst og kaker blir supplert med lunsjrettar og middag. Her startar dei varsamt, med noko pasta og suppe til lunsj, og husmannskost til middag. Fredagar og laurdagar skal opningstidene utvidast frå 18-19-tida kveld til midnatt.

Denne opningshelga blir det ope endå lengre, då skal musikkbaren køyra på til 2 om natta, med livemusikk og alle rettigheiter.

Seks tilsette

Sjølv driv Bjørn eige firma, Strøno Weldservice AS, der han òg har fleire tilsette.

– Eg skal jo tilbake til anleggsbransjen, men desse månadane har det gått mykje tid med til å bygga kjøkken, kafé og musikkbar. Så får eg hjelpa til så mykje eg kan utanom jobb, og på kveldstid med baren.

Hanne's Konditori & Musikkbar får seks tilsette frå start.

Nostalgisk servise

– Sjå på dette serviset, seier Bosse, og hentar fram kopp og asjett frå ei eigen hylle.

– Du får ikkje tak i sånne lenger, dette er ekte Bavaria frå før- og etterkrigstida. Eg tenkte dette var noko dei vaksne kundane ville setja pris på.

Han tenkte rett. Dei to første kundane som sette seg ned i kafeen er svært nøgde.

– For det første har det blitt veldig fint her, for det andre var desse koppane fantastiske å drikka av, seier Solveig Lyngbø.

Venninna Jorunn Ravnskog hadde i mange år arbeidsplassen sin tvers over gata.

– Eg jobba på Posten og hugsa at brått forsvann nesten alle leigetakarane i Brugata. No er det kjekt å sjå at det stadig aukar på med liv i denne delen av sentrum igjen.

Oppdatert: Før klokka 12 var det kø ved disken og folk rundt nesten alle bord.