Har betalt 1,3 milliardar i skatt

Onsdag 22. juni er dagen då skatteoppgjeret blei klart. Rett nok har dei som er elektroniske brukarar av skatteetaten fått tilgong til sine opplysninger i eit par dager allereie.

− Viss du ikkje får skatteoppgjeret ditt no, kan det vere at du er gift med ein som er næringsdrivande, har levert sjølvmeldinga på papir eller er tatt ut i kontroll seier seksjonssjef i Skatt vest, Sven Arne Lindebjerg.

8 992 får att

Dei samla tala for Os syner at vi tilsaman har betalt 1 376 959 733 kroner i førehandsskatt. Når skattevesenet no har kontrollert likningane viser det seg at vi skulle ha betalt 1 325 508 982, altså har dei 8 992 som har betalt for mykje tilsaman 99 464 074 kroner til gode.

I snitt blir det 11 061 kroner til gode på kvar.

2 253 må betale meir

Sjølv om osingane totalt sett har betalt for mykje i skatt, så er det 2 253 osingar som ikkje har betalt nok.

Til saman skuldar dei 47 261 489 kroner i restskatt, tilsvarande 20 977 på kvar.

På snittet

Ser ein på tala for heile Hordaland så ligg osingane som får att på skatten på snittet, medan dei som må betala restskatt ligg noko høgre enn resten av hordalendingane.

I Hordaland får 256 688 skattytarar kr 2,8 milliardar igjen på skatten, mens 56 387 må betale 987 millionar kroner i restskatt. Gjennomsnittleg skatt til gode er 11 032 kroner og restskatt 17 506 kroner.

Restskatt

Er restskatten din på over tusen kroner vert beløpet delt på to terminar. Første termin er 20. august, og andre termin er 24. september. For beløp under tusen kroner er fristen for å betale restskatten 20. august.

Nytt i år er at elektroniske brukarar får faktura med betalingsinformasjon og forfallsfrist i meldingsboksen sin i Altinn. Viss du ikkje er elektronisk brukar, får du faktura med betalingsinformasjon i posten.